კორონავირუსთან დაკავშირებით მოქმედმა უწყებათაშორისმა საკოორდინაციო საბჭომ საქართველოს მასშტაბით სასწავლო დაწესებულებებში, მათ შორის საბავშვო ბაღებში სწავლის პროცესი მარტის შუა რიცხვებიდან შეაჩერა, აღდგენა კი სექტემბრამდე არ იგეგმება.
„კომერსანტი“ დაინტერესდა რა მდგომარეობაში აღმოჩნდნენ კერძო საბავშვო ბაღები, რომლებიც ფაქტობრივად ყველაზე რთულ მდგომარეობაში არიან, რადგან ივნისიდან თითქმის ყველა ბიზნესი განაახლებს მუშაობას, მათთვის დაწესებული აკრძალვის მოხსნა კი მხოლოდ სექტემბრიდან იგეგმება.
„კერძო ბაღების ასოციაციაში“ აცხადებენ, რომ ფაქტობრივად 6 თვიანი წყვეტა აქვთ, კერძო ბაღებისთვის კი ეს დიდი ზარალია, რადგან საჯარო ბაღებისგან განსხვავებით, მათი შემოსავალი ნულის ტოლია, ხოლო ხარჯი, რომელიც ხელფასებს, იჯარას და საბანკო ვალდებულებებს გულისხმობს - ძალიან მაღალია. ასოციაციამ განათლების სამინისტროს თხოვნითაც მიმართა, რათა სხვა ბიზნესების მსგავსად კერძო ბაღების მუშაობა 8 ივნისიდან აღდგენილიყო, თუმცა ჯერჯერობით პასუხი არ მიუღიათ.
საბავშვო ბაღში „ანბანელა“ აცხადებენ, რომ მაშინ როდესაც თითქმის ყველა ბიზნესი გაიხსნა, მშობლებისგან დიდი სურვილია საბავშვო ბაღებში სასწავლო პროცესის აღდგენა.
„ფაქტობრივად ყველა ბიზნესი გაიხსნა და ძალიან დიდი პრობლემა რჩება საბავშვო ბაღებისთვის, რადგან ბევრი თანამშრომელი ფაქტობრივად უხელფასოდაა დარჩენილი, გვაქვს იჯარის და საბანკო ვალდებულებები, ასევე 6 თვიანი წყვეტა გამოგვდის სექტემბრის დასაწყისამდე რომ ვერ შევძლოთ ფუნქციონირება, რაც ჩვენთვის ძალიან დიდი ზარალია. გარდა ამისა, მშობლების მხრიდანაც ყოველდღიურად დიდი აქტიურობა შეინიშნება, რადგან თითქმის ყველა ბიზნესი გაიხსნა და მშობლებს დიდი სურვილი აქვთ ბავშვი ბაღში მოიყვანონ, რადგან თვითონ სამსახურში გადიან და ამ კუთხით პრობლემები ექმნებათ. სამინისტროსაც მივმართეთ თხოვნით, 8 ივნისიდან ისევე როგორც სხვა ბიზნესს ჩვენც დაგვრთონ მუშაობის განახლების ნება“, - განაცხადეს საბავშვო ბაღში „ანბანელა“.
საბავშვო ბაღში „იუჯი“ (UG) განმარტავენ, რომ ბაღს არ გააჩნია არანაირი შემოსავალი, ამის გამო ფინანსურ კრიზისში აღმოჩნდა. მათივე ინფორმაციით, იმის გამო, რომ ბაღების გახსნა 14 სექტემბრამდე გადაიდო ბევრი სააღმზრდელო დაწესებულებისთვის შესაძლოა ეს დახურვის ტოლფასი აღმოჩნდეს.
„კორონავირუსის მიერ შექმნილმა სიტუაციამ განსაკუთრებულ ვითარებაში ჩაგვაყენა, შეიცვალა საგანმანათლებლო და სააღმზდელო სიტუაცია. ბაღის სპეციფიკისგან გამომდინარე, ჩვენ ონლაინ გაკვეთილებზე ვერ გადავიდოდით. შექმნილმა მდგომარეობამ, რთულ სიტუაციაში ჩაგვაყენა, რადგან ბაღს არ გააჩნია არანაირი შემოსავალი, ამის გამო ფინანსურ კრიზისში აღმოვჩნდით, იძულებული გავხდით ყველანაირი განვითარების პროგრამა გადაგვედო და კრიზისული ბიუჯეტი აგვემოქმედებინა, რაც მხოლოდ ხელფასების გაცემაზე ორიენტირებას გულისხმობდა, რათა თანამშრომლები შეგვენარჩუნებინა. თუმცა მაისის თვეში ეს ვეღარ შევძელით და იძულებულები გავხდით ისინი უხელფასო შვებულებაში გაგვეშვა. დიდი იმედი გვქონდა, რომ საზაფხულო ბაღი ჩვენს მდგომარეობას გამოასწორებდა, რადგან მშობლების მხრიდან დიდი მოთხოვნა იყო, თუმცა ბაღების გახსნა 14 სექტემბრამდე გადაიდო რაც სააღმზრდელო დაწესებულებისთვის დახურვის ტოლფასია. შთაბეჭდილება მრჩება, რომ ბაღები, სკოლები და საერთოდ განათლების სისტემა არავის აინტერესებს და არც კი ვახსოვართ“, - აცხადებენ საბავშვო ბაღში „იუჯი“ (UG).
ნინო თამაზაშვილი