საქართველოს ბანკის მხარდაჭერით, მსოფლიო ბაზარზე ტოპ აქსელერატორმა - 500 Startups-მა აქსელერაციის პროგრამაზე რეგისტრაცია დაიწყო. დაინტერესებულ სტარტაპებს 25 მაისამდე აქვთ შესაძლებლობა, შეავსონ განაცხადი და გახდნენ მსოფლიოში ერთ-ერთი ყველაზე მსხვილი აქსელერაციის პროგრამის ნაწილი. ამისთვის კი საჭიროა მათ გაიარონ რეგისტრაცია შემდეგ ბმულზე: https://ecosystems.500.co/500georgia
აქსელერაციის პროგრამაში მონაწილეობა სტარტაპებს მისცემს ძალიან დიდ შესაძლებლობას სხვადასხვა წარმატებული კომპანიის დამფუძნებლებთან და მენტორებთან ერთად იმუშაონ საკუთარი იდეების დახვეწაში. ამასთან, მოიძიონ ფინანსური რესურსი, მიიღონ საინტერესო ინფორმაცია მარკეტინგის, პროდუქტის დიზაინის, გაყიდვებისა და სხვა მათთვის საჭირო სფეროების შესახებ. აქსელერაციის პროგრამაში მონაწილე სტარტაპებისთვის სექტორული უპირატესობა არ არსებობს. თუმცა, კომპანიებმა უნდა წარადგინონ ტექნოლოგიური ან ტექნოლოგიაზე დაფუძნებული, ინოვაციური გადაწყვეტები. აქსელერაციის პროცესი დაყოფილია ორ ნაწილად. პროგრამა წარმოადგენს ინტენსიური და დისტანციური ტრენინგის კომბინაციას, რომელიც 10 თვის განმავლობაში ხორციელდება. 2020 წლისთვის დაგეგმილია 2 ნაკადი. ერთი გაზაფხულზე, მეორე კი შემოდგომაზე.
„500 სტარტაპის საქართველოში გამოჩენა შეიძლება ითქვას, რომ არის ძალიან მნიშვნელოვანი მოვლენა რაც ორ რამეს ნიშნავს ერთდროულად: პირველი ეს არის ძალიან დიდი ნდობის გამოცხადება ქართული ნიჭის და ტალანტის მიმართ, რადგან მათი შემოსვლა ცალსახად ნიშნავს, იმას, რომ ამ გეოგრაფიაზე, ამ რეგიონში სადაც ჩვენ ვართ ღირს დროის და ენერგიის დახარჯვა იმ ადეებზე სამუშაოდ, რომელიც ძალიან განსხვავებული და უნიკალურია. მეორე ეს არის ძალიან დიდი პასუხისმგებლობა, რომ როგორც ქვეყანამ შესაბამისი ეკოსისტემის მიწოდების მხრივ, ასევე ქართულმა სტარტაპებმა გავამართლოთ ის მოლოდინები, რისი რწმენითაც ეს ორგანიზაცია შემოდის საქართველოში. ვენჩურული კომპანიები, ფონდები თუ კერძო ინვესტორები, რომელიც ინოვაციურ სტარტაპებში ახდენენ თანხების ინვესტირებას, ადევნებენ თვალს 500 სტარტაპის განვითარებას გეოგრაფიაში და იმეორებენ მათ გზას, რაც თავის მხრივ გულისხმობს ჩვენს ეკოსისტემებზე ინტერესის გაჩენას ზოგადად ინდუსტრიაში, რაც თავის მხრივ გამოიხატება მეტი მოზიდული თანხით და გლობალზე გასული ქართული გუნდებით“, - განაცხადა საქართველოს ბანკის სტარტაპების განვითარების მიმართულების ხელმძღვანელმა ვახო ვახტანგიშვილმა.
500 Startups-ი საქართველოში ინოვაციების და ტექნოლოგიების სააგენტოს ინიციატივითა და საქართველოს ბანკის ფინანსური მხარდაჭერით შემოვიდა. სამმხრივი შეთანხმება მხარეებს შორის 2020 წლის 20 თებერვალს გაფორმდა.
„500 Startups ის შემოსვლის ბენეფიტები იყო - 1. საქართველოს გლობალურ სტარტაპ რუკაზე წარმატებული გამოჩენა; 2. ქვეყნის რეგიონალურ ჰაბად პოზიციონირება; 3. ქვეყანაში ინოვაციების და სტარტაპების მიმართულებით ინვესტიციების მოზიდვა და რაც მთავარია 4. მაღალი პოტენციის მქონე ინოვაციების/სტარტაპების აღმოჩენა, მათი მასშტაბურ პროექტებად ქცევა, გლობალურ ბაზარზე გაყვანა, ასევე 5. მაღალკვალიფიციური და მაღალანაზღაურებადი სამუშაო ძალის შექმნა; 6. გლობალურ გამოწვევების შესახებ (მათ შორის covid-19) ინოვაციური გადაწყვეტების ხელშეწყობა; 7. კერძო სექტორიდან ინოვაციებში რესურსების მობილიზება; 8. მეწარმეული უნარების საგრძნობლად განვითარება; 9. Shadowing - სხვა სტარტაპ პროგრამების ორგანიზაციების (დაინტერესებული მხარეების) წარმომადგენლების გადამზადება; 10. საბოლოო ჯამში ქვეყანაში ცოდნაზე დაფუძნებული ეკონომიკის ფორმირება“, - აცხადებენ ინოვაციების და ტექნოლოგიების სააგენტოში.
500 Startups ბიზნეს იდეის საწყის ეტაპზე დამფინანსებელი აქსელერატორია. გარდა თანაინვესტირებისა, 500 Startups ხელს უწყობს ინოვაციური ეკოსისტემების განვითარებას, მხარს უჭერს სხვადასხვა საგანმანათლებლო პროგრამის, ღონისძიების, კონფერენციის ორგანიზებას. 500 სტარტაპმა მსოფლიოს მასშტაბით 1 მილიარდი დოლარის ღირებულების ინვესტირება მოახდინა 17 სტარტაპ კომპანიაში. მათ შორის არიან Credit Karma, Twilio, Canva, Grab, Gitlab, VTS, Bukalapak, The RealReal, Talkdesk, Knotel და Udemy.
(R)
საქართველოს ბანკი
