ბოლო წლების განმავლობაში ქვეყნიდან კვალიფიციური კადრების გადინების პრობლემაზე ბიზნეს სექტორი აქტიურად საუბრობს. ეს პროცესი კი განსაკუთრებით პოსტ-პანდემიურ პერიოდში შეიმჩნევა, როცა კომპანიებს გარკვეული პერიოდი გაჩერება მოუწიათ, შემდეგ კი ბიზნესის გამოცოცხლების პარალელურად ბაზარზე ახალ კადრებზე დიდი მოთხოვნა გაჩნდა. რითეილი, ტურიზმი და ახლა უკვე სამშენებლო სექტორი კვალიფიციური კადრების დეფიციტზე უკვე ღიად აცხადებს.
ინფრასტრუქტურის მშენებელთა ასოციაციის გამგეობის წევრი, კომპანია „ინ-სი“-ს გენერალური დირექტორი ზვიად თოიძე „კომერსანტთან“ ამბობს, რომ სექტორიდან კადრების გადინების პროცესი აქტიურად მიმდინარეობს და ეს პრობლემა მომავალში უფრო გამძაფრდება.
„კადრების გადინება სამშენებლო სექტორში ბოლო წლებია ძალიან იგრძნობა, ძირითადად აღმოსავლეთ ევროპის ქვეყნებში და პოლონეთში მიდიან. განსაკუთრებით სამწუხაროა კვალიფიციური კადრების გადინება და ეს მომავალში პრობლემა უფრო მეტად გამწვავდება, მას შემდეგ რაც უკრაინაში ომი დასრულდება და აღმშენებლობა დაიწყება, საქართველოდან კადრების მნიშვნელოვანი გადინება სწორედ იქეთ დაიწყება, ამიტომ ამაზე წინასწარ უნდა ვიფიქროთ. რეალურად ძალიან რთულადაა საქმე და წინ უფრო ცუდი პერსპექტივაა. ცოტა ხნის წინ გვქონდა ჩართვები უკრაინულ მხარესთან და ამბობენ, რომ მთელი ევროპის და კავკასიის სამშენებლო კომპანიებიც რომ ჩავიდნენ, საკმარისი მაინც არ იქნება. ქვეყანაში ინფლაციის ზრდის შესაბამისად ხელფასის მატება ვერ ხდება. როცა დასაქმებულები აქაური ხელფასით ვერ ახერხებენ ცხოვრების უზრუნველყოფას, აღმოსავლეთ ევროპის სხვადასხვა ქვეყანაში მიდიან“, — ამბობს ზვიად თოიძე.
ინფრასტრუქტურის მშენებელთა ასოციაციის წევრი კადრების გადინების შეჩერების საშუალებებზეც საუბრობს და აღნიშნავს, რომ ზოგადად სამშენებლო სექტორი საჭიროებს რეფორმას, რომელმაც საბოლოო ჯამში აღნიშნული პრობლემაც უნდა გადაჭრას.
„გამოსავალს კი იმაში ვხედავ, რომ სამშენებლო მომსახურების ფასები გახდეს ადექვატური. თუ მაგალითად ხელოსანს ან მუშას ექნება ის ანაზღაურება რაც მიახლოებული იქნება ევროპულ ანაზღაურებასთან, მართალია ჩვენ მათ სრულად ვერ გავუთანაბრდებით, მაშინ თუნდაც ცოტა ნაკლებ ხელფასს და თავის სახლში ყოფნას არჩევენ. ზოგადად კი სამშენებლო სექტორს სჭირდება რეფორმა, რომელიც რამდენიმე მნიშვნელოვან ცვლილებას საჭიროებს და თუ მას კომპლექსურად მივუდგებით, შესაძლოა ბევრ პრობლემას უშველოს, მათ შორის კადრების გადინებასაც. ასე ცალკე აღებული კი ამ პრობლემის მოგვარება წარმოუდგენელია“, — განმარტავს თოიძე.