უკრაინის სახელმწიფო საწარმო "Антонов"-მა პირველად თავის ისტორიაში გამოუშვა მძიმე სატვირთო თვითმფრინავი Ан-178, რომელშიც არც ერთი რუსული სათადარიგო ნაწილი არაა - იტყობინება სააგენტო Укринформ-ი კომპანიის დირექტორზე ალექსანდრ ლოსზე დაყრდნობით.
„ეს არის პირველი თვითმფრინავი, სადაც არაფერი რუსული არაა. ჩვენ ხშირად გვაბრალებენ, რომ რამდენიმე წელია არ გვიწარმოებია სერიული თვითმფრინავები, მაგრამ უნდა გვახსოვდეს, რომ 2014 წელს რუსული აგრესიის დაწყების შემდეგ, ჩვენ არა მხოლოდ გასაღების, არამედ მნიშვნელოვანი სათადარიგო ნაწილების მიღების ბაზარი დავკარგეთ. რუსეთი ჩვენთვის დაიხურა, და ამან ახალი გამოწვევების წინაშე დაგვაყენა“ - განაცხადა მან.
ლოსის თქმით, ნაწილების მიწოდების ალტერნატიული წყაროების და ახალი მიმწოდებლების მოპოვებას რამდენიმე წელი დასჭირდა.
ამჟამად თვითმფრინავზე კომპონენტების 1/3 უკრაინულია, ხოლო 2/3 - ამერიკული.
„საპროექტო სამუშაოები რუსული ნაწილების ჩანაცვლებისთვის ჩვენ თავად ჩავატარეთ. ფართო საერთაშორისო კოოპერაცია ჯერ კიდევ 2010 წელს იგეგმებოდა, პროექტ Ан-178-ზე მუშაობის პროცესში. 2015-2016 წლებში ჩვენ ეს სამუშაო გავაგრძელეთ, და შედეგიც სახეზეა“ - განაცხადა ალექსანდ ლოსმა.
Ан-178 საბჭოთა პერიოდში გამოშვებული Ан-12-ს ბაზაზე შეიქმნა. Ан-12 მსოფლიოში ყველაზე დიდ თვითმფრინავად ითვლებოდა, და გარკვეული პოპულარობით სარგებლობდა დასავლეთში, მათ შორის კინემატოგრაფში - გიგანტური სატვირთო ლაინერი ხშირად ჩანს ჰოლივუდის ფილმებში, მაგალითად, ფილმ-კატასტროფაში „ The day after”.
ავიაციის დარგში უკრაინელი სპეციალისტების აზრით, «Антонов»-ს უახლოესი 10-12 წლის მანძილზე 800 ლაინერის გამოშვება შეუძლია. 2015 წელს სახელმწიფო კონცერნის გენერალურმა კონსტრუქტორმა დმიტრი კივამ განაცხადა, რომ წინასწარი შეკვეთები უკვე 100 ერთეულს აღწევს, თვითმფრინავის ყიდვით საუდის არაბეთი და სპარსეთის ყურის ქვეყნები დაინტერესდნენ.
5.ua
მოამზადა თენგიზ აბლოთიამ