გერმანიის მთავრობამ უარი განაცხადა შეიარაღების მიწოდებაზე უკრაინისთვის, რომელიც რუსეთთან კონფლიქტის მდგომარეობაშია. უკრაინის ელჩს გერმანიაში ანდრეი მელნიკს კი არ სურს ბერლინის ამ გადაწყვეტილებასთან შეგუება და კვლავაც დაჟინებით ითხოვს იარაღის მიწოდებას, თანაც კონკრეტულ სახეობებს ასახელებს.

„პირველ რიგში საუბარია საბრძოლო ხომალდებზე, რომლებიც საუკეთესოა მსოფლიოში და რომლებიც ჩვენ უკიდურესად გვჭირდება შავი და აზოვის ზღვების გრძელი სანაპიროების დასაცავად“, - განაცხადა ელჩმა dpa-თან ინტერვიუში, რომელიც ოთხშაბათს, 19 იანვარს გამოქვეყნდა.

მელნიკის თქმით, მის ქვეყანას ასევე სასიცოცხლოდ ესაჭიროება თანამედროვე საზენიტო კომპლექსები. მისი თქმით, ასეთ კომპლექსებს გერმანიის თავდაცვის კონცერნები აწარმოებენ.
გერმანიის კანცლერმა ოლაფ შოლცმა 18 იანვარს კიდევ ერთხელ არ დააკმაყოფილა კიევის თხოვნა და აღნიშნა, რომ გერმანია ბევრი წელია დაბალანსებული სტრატეგიით ხელმძღვანელობს, რაც ლეტალური შეიარაღების მიწოდებას გამორიცხვას.

ზოგიერთი გერმანელი პოლიტიკოსი უკრაინისთვის იარაღის მიწოდების მომხრეა

ამავე დროს, გერმანიაში სულ უფრო ხშირად აყენებენ ეჭვქვეშ ოფიციალური ბერლინის ასეთ პოზიციას. ბუნდესტაგის თავდაცვის კომიტეტის წარმომადგენელმა მარი-ატრეს ცემერმანმა განაცხადა, რომ გერმანია უნდა დაფიქრდეს უკრაინისთვის თავდაცვითი შეიარაღების მიწოდებაზე.

ამ მოსაზრებას ოპოზიციური ქრისტიან-დემოკრატიული პარტიის წარმომადგენელი ჰენინგ ოტე ეთანხმება. „თუ უკრაინა თავდაცვით შეიარაღებას გვთხოვს რუსეთის შესაძლო აგრესიისგან თავის დასაცავად, ჩვენ არ შეგვიძლია ამაზე უარის თქმა. ეს უპასუხისმგებლო პოლიტიკაა“, - აღნიშნა ოტემ და დასძინა, რომ ის არ ეტყოდა უკრაინას უარს საზენიტო კომპლექსების მიწოდებაზე.

ვაშინგტონი: რუსეთი უკრაინას ნებისმიერ მომენტში შეიძლება დაესხას თავს

ამასობაში, ვაშინგტონში კიდევ ერთხელ დაადასტურეს, რომ უკრაინაში რუსეთის სამხედრო ინტერვენცია რეალური საფრთხეა. „ახლა იმ ეტაპზე ვართ, როდესაც რუსეთს ნებისმიერ მომენტში შეუძლია უკრაინაზე თავდასხმა“, - განაცხადა 18 იანვარს ვაშინგტონში თეთრი სახლის ოფიციალურმა წარმომადგენელმა ჯენ პსაკიმ. არსებულ ვითარებას მან „უკიდურესად საშიში“ უწოდა. მისივე თქმით, ამის გამო აშშ-ის ადმინისტრაცია არცერთ სცენარს არ გამორიცხავს.

დასავლეთის მონაცემებით, უკრაინის საზღვართან და ყირიმის ნახევარკუნძულზე ამ დროისთვის დაახლოებით 100 000 რუსი სამხედროა მობილიზებული. დასავლეთი რუსეთს ჯარების გაყვანისკენ მოუწოდებს და უკრაინაზე თავდასხმის საპასუხოდ მასშტაბური სანქციებით ემუქრება. ამავე დროს, რუსეთი უარყოფს უკრაინაზე ახალ თავდასხმას და აშშ-ისა და ნატოსგან დოკუმენტირებულ გარანტიებს ითხოვს, რომ ალიანსი აღმოსავლეთით გაფართოებაზე უარს იტყვის.

DW.DE