უკრაინის პრეზიდენტმა, ვოლოდიმირ ზელენსკიმ მთავრობას ბელარუსთან საჰაერო მიმოსვლის შეწყვეტის გადაწყვეტილების მომზადება დაავალა. უკრაინის პრეზიდენტის ადმინისტრაციის განცხადებით, აღნიშნულ საკითხზე ზელენსკიმ მთავრობის წევრებთან ისაუბრა. პრეზიდენტის შესაბამისი გადაწყვეტილება ავიაკომპანია Ryanair-ის თვითმფრინავს უკავშირდება. 23 მაისს ლუკაშენკას რეჟიმმა მინსკის აეროპორტში დაშვება აიძულა ირლანდიური ავიაკომპანია Ryanair-ის თვითმფრინავს, რომელიც ათენი-ვილნიუსის რეისს ასრულებდა. ლაინერში ერთ-ერთი მგზავრი, ოპოზიციურად განწყობილი ბელარუსი ჟურნალისტი, რომან პროტასევიჩი იყო, რომელიც დააკავეს.
ლუკაშენკას რეჟიმის წინააღმდეგ საპროტესტო აქცია გაიმართა თბილისში, ბელარუსის საელჩოსთან. შემთხვევას გამოეხმაურა საქართველოს პრეზიდენტ სალომე ზურაბიშვილი. მისი განცხადებით, ჟურნალისტის დაკავება მიუღებელია, მრავალი საერთაშორისო ნორმა დაირღვა.
ევროკავშირში ბელარუსის ელჩი, ალექსანდრ მიხნევიჩი ევროკავშირის უმაღლესი წარმომადგენლის, ჯოზეფ ბორელის მოთხოვნით ევროკავშირის საგარეო კავშირების სამსახურის გენერალურმა დირექტორმა, სტეფანო სანინომ დაიბარა. განცხადებაში ნათქვამია, რომ ელჩი მიხვენვიჩი ევროკავშირის ინსტიტუტებისა და ევროკავშირის წევრი სახელმწიფოების მიერ ბელარუსის ხელისუფლების ძალადობრივი ქმედებების დაგმობის თაობაზე ინფორმირებული იყო. განცხადებაში, ასევე, აღნიშნულია, რომ ბელარუსის ხელისუფლების ქმედებას ევროპული საბჭო 24 მაისს განიხილავს და მათ შორის პასუხისმგებელი პირების მიმართ ზომების მიღების საკითხსაც.
ბელარუს ხალხს მხარდაჭერას უცხადებს ამერიკის შეერთებული შტატების სახელმწიფო მდივანი, ენტონი ბლინკენი იგი ბელარუსი აქტივისტის დაკავებას გმობს და ლუკაშენკოს რეჟიმის თავხედურს უწოდებს.
NATO-ს გენერალური მდივანი, იენს სტოლტენბერგი კი მიიჩნევს, რომ მინსკში Raynair-ის რეისის იძულებით დასმასა და ბელარუსი აქტივისტის დაკავება სერიოზული და საშიში ინციდენტია.