თბილისის შოთა რუსთაველის სახელობის საერთაშორისო აეროპორტი ქვეყნის ყველაზე დიდი სასაზღვრო პუნქტია. 2021 წლის იანვარ ივლისში ყოველი მე-3 ვიზიტორი ქვეყანაში ამ გზით შემოვიდა. სანამ ტურისტები ნარიყალას, მცხეთას, უფლისციხეს ან ყაზბეგს ნახავდნენ, აეროპორტის უკიდურესად დაბინძურებული ტერმინალი მოხვდებოდათ თვალში.

თბილისის აეროპორტმა ყურადღება ჯერ კიდევ 2000-იან წლებში მას შემდეგ მიიქცია, რაც ქარმა ტერმინალს რამდენჯერმე სახურავი გადახადა, მაშინ TAV-მა უცნაურად იმართლა თავი - არ გვეგონა ასეთი ძლიერი ქარი თუ იქნებოდაო.

სახურავი მხოლოდ პრობლემის ნაწილი იყო. მაღალი ტარიფები ავიაციის და ტურიზმის განვითარების შეფერხებას იწვევდა, ქუთაისის აეროპორტი სწორედ ამ მიზნით აშენდა. თუ 2013-2019 წლებში თბილისის აეროპორტის მგზავრთნაკადი 157%-ით გაიზარდა, იმავე პერიოდში ქუთაისის აეროპორტში ზრდის ტემპმა 364% შეადგინა და ბათუმის აეროპორტი, რომელშიც ასევე TAV ოპერირებს, უკან ჩამოიტოვა. თუ ქუთაისიდან მილანში ან ფრანკფურტში მოსახვედრად ბილეთის წინასწარ ყიდვის შემთხვევაში 22-25 დოლარი საკმარისია, თბილისის აეროპორტში $24-ს მხოლოდ მოსაკრებლის ღირებულება შეადგენს.

აეროპორტში მეორე ასაფრენი ბილიკის მაგივრად TAV-ის გადაწყვეტილებით მხოლოდ არსებული ბილიკი მოდერნიზება მოხდა, კომპანიის მტკიცებით მასზე $65 მლნ დაიხარჯა და ამის სანაცვლოდ ოპერირების ვადა 10 წლითა და 9 თვით – 2037 წლის ნოემბრამდე გახანგრძლივდა.

თბილისის აეროპორტს შეიძლება სინგაპურის ჩანგის აეროპორტთან გათანაბრება ვერ მოვთხოვოთ, მაგრამ ელემენტარული ჰიგიენური ნორმების უგულებელყოფა უკვე წითელი ხაზია. ფოტოებზე, რომლებიც „კომერსანტმა“ გადაიღო აეროპორტში, კარგად ჩანს დაბინძურებული იატაკი და საპირფარეშოები, კუთხეებში მიყრილი ნაგავი – სრული ანტისანიტარია!

ფოტოებიდან ცხადი ხდება, რომ მიმდებარე ტერიტორია 1 დღის დაულაგებელი არ არის.

ძნელი წარმოსადგენი არ არის, რა შთაბეჭდილება შეიძლება დარჩეს ტურისტს ან ინვესტორს,  აღნიშნული სურათის დანახვისას.

თუ სახელმწიფომ TAV-ს კონტრაქტი კიდევ არ გაუხანგრძლივა, ის თბილისში 2037 წლის ბოლომდე დარჩება. სახელმწიფოსთან კომპანიის კონტრაქტში შეტანილია თუ არა პუნქტი აეროპორტის სანიტარიასთან დაკავშირებით, ეს არ ვიცით, მაგრამ ნებისმიერი პასუხისმგებლობიანი კომპანია რომ ამ საკითხს უდიდეს ყურადღებას უთმობს, ეს ფაქტია. თუმცა აქ მხოლოდ კომპანიის უპასუხისმგებლობა არ არის პრობლემა – მთავარია ქვეყნის იმიჯი, რომლის შემოსავლების მნიშვნელოვანი ნაწილი სწორედ ტურიზმზე მოდის. დაასუფთავეთ!

თბილისის აეროპორტი 2005 წლის 31 ოქტომბრიდან თურქული TAV-ის მმართველობაშია. 2006-2020 წლებში აეროპორტი 24 მლნ-მდე მგზავრს მოემსახურა, მათგან ყველაზე ბევრ - 3.8 მლნ-ს 2018 წელს, 2019 წელს რუსეთის მიერ ივლისში ფრენების აკრძალვის შედეგად მგზავრთნაკადი 3%-ით შემცირდა. 2018 წელს საზღვარი თბილისის აეროპორტის მეშვეობით 1.402 მლნ პირმა გადმოკვეთა, 2019 წელს 1.356 მლნ-მ, 2020 წელს კი მხოლოდ 203 ათასმა, რაც პანდემიითა და ლოქდაუნით იყო გამოწვეული.