ეკონომიკისა და მდგრადი განვითარების სამინისტროს ინოვაციებისა და ტექნოლოგიების სააგენტოს ჰაკათონის „uHack სოფლის განვითარებისთვის“ გამარჯვებულები ცნობილია.
KAZBEGI UNION-მა თვითდასაქმების მსურველთათვის ახალი მიდგომა შეიმუშავა. შეიქმნება პლატფორმა, რომელიც ყაზბეგის რაიონის მოსახლეობას და მათ საჭიროებებს გააერთიანებს, სოფლად კომუნიკაციის გაუმჯობესებისა და დასაქმების ხელშეწყობის მიზნით.
მეორე გამარჯვებული პროექტი „ციფრული სოფელია“, რომელიც სოფლის ინოვაციური პლატფორმის შექმნას ითვალისწინებს. ეს იქნება ერთგვარი სოციალური ქსელი, სადაც საკომუნიკაციო საშუალებებად გამოყენებული იქნება ვიდეო, აუდიო და ტექსტური არხები. განსხვავებული მიდგომები საშუალებას მისცემს სასოფლო სექტორს, აამაღლოს მოსავლიანობა, მჭიდრო კავშირი დაამყაროს ქალაქთან და მიიღოს მეტი გასამრჯელო.
ჰაკათონის მიზანი იყო, ციფრული ტექნოლოგიების გამოყენებით, სასოფლო დასახლებებში მცხოვრები ან დასაქმებული ადამიანების COVID-19-ის გამოწვევებთან გამკლავებაში ხელის შეწყობა. ჰაკათონი ციფრული ტექნოლოგიებით დაინტერესებულ პირებს, პროგრამისტებს, დიზაინერებსა და აქტივისტებს აერთიანებდა. პროექტის ფარგლებში 70-მდე განაცხადი შემოვიდა, ფინალურ ეტაპზე ჟიურის წინაშე 13 გუნდი წარდგა. თითოეულ გამარჯვებულ გუნდს იდეის განხორციელებისთვის 20 000 ლარი გადაეცა.
ღონისძიება გაიმართა ევროკავშირის (EU) სოფლისა და სოფლის მეურნეობის განვითარების ევროპის სამეზობლო პროგრამა ENPARD-ის მხარდაჭერით. ჰაკათონის პარტნიორები არიან გაეროს განვითარების პროგრამა საქართველოში (UNDP), სოფლის და სოფლის მეურნეობის სააგენტო და Forset.
(NS)