კორონავირუსის გამო დაწესებული შეზღუდვები სასტუმროებსა და რესტორნებს შვედური მაგიდის პრინციპით გამასპინძლების უფლებას არ აძლევს, ამასთან რეგულაციები კვლავ მოქმედებს და ამ დრომდე აკრძალულია 10 კაცზე მეტი პირის შეკრება, შესაბამისად იკრძალება ქორწილები, დიდი დაბადების დღეები და წვეულებები. აქედან გამომდინარე, მასშტაბური ღონისძიებები ქვეყანაში არ ტარდება, რამაც „ქეითერინგ“ კომპანიებს, რომლებიც ძირითადად ფურშეტების მოწყობაზე მუშაობდნენ, დიდი დარტყმა მიაყენა.
„ქეითერინგ ჯგუფი საქართველოს“ დამფუძნებელი ლადო ქველაძე „კომერსანტთან“ საუბრისას აღნიშნავს, რომ უფუნქციოდ დარჩენილმა კომპანიებმა შესაძლოა საქმიანობის გაგრძელება პანდემიის შემდეგ ვეღარ შეძლონ.
„ძალიან ცუდ მდგომარეობაში ვართ, ვერაფერს ვაკეთებთ და უფუნქციოდ დავრჩით. ჯერჯერობით არც კი ვფიქრობთ რაიმე სიახლეზე ან ცვლილებაზე, ზოგადად ერთადერთი რასაც ვვარაუდობთ არის ის, რომ შესაძლოა აღნიშნული საქმიანობა საერთოდ აღარ გავაგრძელოთ. ზარალი როგორც ასეთი, ფურშეტების მომზადების თვასაზრისით დიდი არ გვაქვს, რადგან პროდუქციას, მხოლოდ შეკვეთის შემდეგ ვამზადებთ, თუმცა თანამშრომლების გათავისუფლება მოგვიწია, რადგან ხელფასებს ვეღარ ვუხდიდით“, – განმარტა ლადო ქველაძემ.
ქეითერინგ კომპანია ETG GROUP-ის დამფუძნებელმა გიორგი საღინაძემ „კომერსანტთან“ შემცირებულ დატვირთვაზე ისაუბრა და აღნიშნა, რომ წინა წლის ანალოგიურ პერიოდთან შედარებით დატვირთვა დაახლოებით 20%-ია, შემოსავლები კი 5-ჯერ შემცირდა.
„პანდემია ჩვენს ბიზნესზე ძალიან ცუდად აისახა, რადგან შეკვეთები 3 თვის განმავლობაში სრულად შეჩერებული იყო. მოგებაზე ზედმეტია ლაპარაკი, კომპანიას თვიდან თვემდე თავის გატანაც კი უჭირს. ივნისში ავმუშავდით, მაგრამ წინა წლის ანალოგიურ პერიოდთან შედარებით დატვირთვა რომ შევადაროთ დაახლოებით 20% არის მხოლოდ, შემოსავლები 5-ჯერ შემცირდა. ძირითადად პატარა დაბადები დღეების შეკვეთები გვაქვს, რომელსაც სახლში იხდიან. შეზღუდვები ჩვენზე ძალიან ცუდად აისახება, იმიტომ რომ ფაქტიურად მასშტაბურ ღონისძიებებს, ქორწილებს, დიდ დაბადების დღეებს ვერ ვაკეთებთ ღია ცის ქვეშ, რაც სეზონზე ჩვენთვის მთავარი შემოსავლის წყარო იყო. ტრენინგები და სემინარები თითქოს დაუშვეს, მაგრამ დიდი ხანია არც სახელწიფო და არც კერძო სექტორს არ შეუკვეთავს. თანამშრომლებისთვის ხელფასების გაცემა ძალიან გვიჭირდა, 3 თვე უხელფასოდ იყვნენ, ახლა კი მხოლოდ შემცირებული ანაზღაურების გაცემას ვახერხებთ“, - განაცხადა გიორგი საღინაძემ.
ნინო თამაზაშვილი