ფრანგული საცხობი და ტკბილეულის სახლი Ladurée თბილისში, აბაშიძის ქუჩაზე გასულ წელს  გრანდიოზულად გაიხსნა. რესტორანი, რომელიც როგორც კომპანიის წარმომადგენლები აცხადებდნენ ლაქშერი მომსახურეობის სხვადასხვა მიმართულებას აერთიანებდა, რამდენიმე კვირის წინ დაიხურა.

როგორც „კომერსანტს“ რესტორან Ladurée-ს დირექტორმა  გიორგი ღვინაძემ განუცხადა, მიუხედავად პანდემიის გამო არსებული კრიზისისა, ბრენდი საქართველოში რჩება და მხოლოდ ლოკაციის შეცვლას გეგმავს. თუ რატომ გადაწყვიტა კომპანიამ ადგილმდებარეობის ცვლილება, ღვინაძე აცხადებს, რომ უფრო აქტიური ადგილის შერჩევას ფიქრობენ. თუმცა, კონკრეტულად სად და როდის გაიხსნება რესტორანი, დეტალებზე საუბრისგან ამ ეტაპზე გიორგი ღვინაძე თავს იკავებს, ის არც სავაჭრო მოლებში ობიექტის განთავსებას ადასტურებს.

„Ladurée აბაშიძეზე აღარ იქნება, გადავწყვიტეთ ლოკაცია შეგვეცვალა. მიუხედავად პანდემიის გამო არსებული კრიზისისა, ბრენდი საქართველოში რჩება და გასვლას არ გეგმავს, უბრალოდ ტერიტორიულად სხვაგან გადავდივართ. ეს გეგმები პანდემიას არ უკავშირდება, ადრეც ვფიქრობდით ცვლილებებზე, თუმცა ამ ყველაფერმა ეს საკითხი უფრო მეტად დააჩქარა. ამ ეტაპზე მასშტაბის გაზრდას არ ვგეგმავთ, უბრალოდ მივხვდით რომ ცოტა განსხვავებული ლოკაცია გვჭირდება და გვინდა სხვა უფრო აქტიური ადგილი შევარჩიოთ. სამომავლოდ სხვადასხვა ლოკაციაზე ვგეგმავთ ფილიალების განთავსებას, თუმცა ჯერჯერობით დაზუსტებით არ გვაქვს გადაწყვეტილი კონკრეტულად სად და როდის, მიმდინარეობს მუშაობა“, - განაცხადა გიორგი ღვინაძემ.

Ladurée-ს დირექტორის განმარტებით, ისევე როგორც ზოგადად სარესტორნო ბიზნესზე, პანდემიამ მათზეც უარყოფითად იმოქმედა.

„რაც შეეხება პანდემიას, როგორც ყველა სარესტორნო ბიზნესზე ჩვენზეც უარყოფითად იმოქმება არსებულმა ვითარებამ და ზოგადად სექტორს დიდი დარტყმა მიაყენა. კონკრეტულ დანახარჯებზე ვერ ვისაუბრებ, თუმცა Ladurée-ს ჯგუფი დიდია, მსოფლიო მასშტაბით ბევრ ქვეყანაშია წარმოდგენილი, სხვადასხვა მიმართულებებით ვმუშაობთ და აქედან გამომდინარე  პრობლემებს შედარებით მარტივად გავუმკლავდით“, - განმარტავს გიორგი ღვიანიძე.

შეგახსენებთ, რომ ფრანგული საკონდიტრო ბრენდი Ladurée მსოფლიოს მასშტაბით 50 ქვეყანაში არის წარმოდგენილი. იმისთვის, რომ საქართველოში აღნიშნული ბრენდის რესტორანი გახსნილიყო კომპანიამ 6 მლნ ლარის ინვესტიცია განახორციელა.

ნინო თამაზაშვილი