კორონავირუსმა უძრავი ქონების ბაზარი გააჩერა. მოთხოვნა შემცირებულია, როგორც კომერციულ, ასევე საცხოვრებელ ფართებზე. უძრავი ქონებაზე ფასის დაღმასვლა ჯერ არ შეიმჩნევა თუმცა, ამ დარგის წარმომადგენლების თქმით, ამის მოლოდინი არსებობს. დღეს კი როგორც ქირისგან, ასევე უძრავი ქონების შეძენისგან მოსახლეობაც თავს იკავებს და საგანგებო მდგომარეობის დასრულებას ელოდება.
უძრავი ქონების სააგენტოს kibe.ge-ს დამფუძნებელი ნელი გოგუაძის თქმით, შეჩერებული ყიდვა-გაყიდვის მიუხედავად, მათი მუშაობის სპეციფიკიდან გამომდინარე, კომპანიებს წლიური ზარალი არ მიადგებათ.
„ამ ეტაპზე ბაზარზე სრული უძრაობაა, ბიზნესი გაჩერებულია.შემცირდა როგორც გასაქირავებელ, ასევე გასაყიდ ფართებზე მოთხოვნა. პირადად მეც არ ვთანხმდები ამ ეტაპზე მსგავს გარიგეგებს და ვინც მეკონტაქტება, ვურჩევ საგანგებო მდგომარეობის დასრულების შემდეგ მომმართონ.
მიუხედავად იმისა, რომ არ ვმუშაობთ, მცირედი პაუზა წლიურ მოგებაზე გავლენას ვერ მოახდენს, რადგან ამ სფეროში სტაბილური სიტუაციის დროსაც, შეიძლება ორი ან სამი თვე ვერ გაყიდო ფართი, თუმცა მეოთხე თვეს საკმაოდ დიდი მოგებით შეძლო მისი რეალიზაცია. ამიტომ ვერ ვიტყვი, რომ დავზარალდით.“-ამბობს ნელი გოგუაძე და მყიდველების მხრიდან დამოკიდებულებაზეც საუბრობს. მისი თქმით, ფართის შეძენის მსურველები თავს იკავებენ, როგორც საცხოვრებელი, ასევე საოფისე ფართების შეძენისგან, თუ ეს სასიცოცხლოდ მნიშვნელოვანი არ არის. განსაკუთრებით ერიდებიან ფართის ქირაობას, რადგან ასეთ დროს არავის სურს გარისკვა.
გაჩერებულ უძრავი ქონების ბაზარზე საუბრობს სააგენტო „რემაქსის“ ხელმძღვანელი მარიამ ასათიანიც. როგორც მან „კომერსანტთან“ განმარტა, უცხოელებმა, რომლებსაც საცხოვრებელი ან საოფისე ფართები ჰქონდათ დაქირავებული, კორონავირუსის გამო ობიექტები დაცალეს და თავიანათ ქვეყნებში დაბრუნდნენ.
„გაქირავების ნაწილში უძრავი ქონების ბაზარი გაჩერებულია.რაც შეეხება ყიდვას, ამ ეტაპზე ეს ნაწილიც გაჩერებულია. არც ისე დიდი დრო გასულა, რომ მკვეთრად დაცემულიყო საცხოვრებელი ფართის ფასი. ასეთ კრიზისულ პერიოდში უფრო მეტად აქტიურდებიან საინვესტიციო ქონების მყიდველები, ამის მოლოდინი ჩვენც გვაქვს.“-ამბობს მარიამ ასათიანი.
შეგახსენებთ, რომ 21 მარტიდან ქვეყანაში საგანგებო მდგომარეობაა გამოცხადებული, რის შედეგადაც დაიხურა ყველა დაწესებულება და საწარმო, გარდა სურსათის მაღაზიების, აფთიაქების, ბენზისგასამართი სადგურებისა და საავადმყოფოების. ქვეყანაში საგანგებო მდგომარეობა დღეის მონაცემების 2020 წლის 21 აპრილის ჩათვლით გაგრძელდება.
ნათია ლომიძე