საერთაშორისო ტურისტებისთვის საქართველოს საზღვრები შესაძლოა, გეგმის მიხედვით 1-ელი ივლისიდან არ გაიხსნას.საკითხზე უწყებათშორისო კომისიის სხდომაზე იმსჯელეს.
ცნობილია, რომ საქართველოს მოლაპარაკებები ჰქონდა პარტნიორ ქვეყნებთან, მათ შორის ისრაელსა და ევროკავშირის სხვადასხვა სახელმწიფოსთან, თუმცა მათ ქვეყნებში შექმნილი ეპიდემიოლოგიური მდგომარეობიდან გამომდინარე, ტურიზმის და საერთაშორისო საზღვრების გახსნის გარკვეული პერიოდით გადავადება გადაწყვიტეს.
სხდომაზე აღინიშნა, რომ სხვა ქვეყნებთან მიმართებაში შეთანხმება მიღწეული არ არის და შესაბამის გადაწყვეტილებებს საერთაშორისო ტურიზმთან მიმართებაში, არსებული ვითარების გათვალისწინებით, საზოგადოებას უახლოეს პერიოდში გააცნობს.
ტურიზმის ადმინისტრაციის ხელმძღვანელმა მარიამ ქვრივიშვილმა აღნიშნა, რომ მსოფლიოში ეპიდემიური მდგომარეობა არ გაუმჯობესებულა.
"საქართველო ტურიზმის გახსნასთან დაკავშირებით ფრთხილობს, რადგან ჩვენი სტრატეგია მოქალაქეების უსაფრთხოების დაცვაა. ვაკვირდებით მსოფლიოში განვითარებულ მოვლენებს. ქვეყნებმა მიიღეს გადაწყვეტილება გადაავადონ ტურიზმის და საერთაშორისო საზღვრების გახსნა გარკვეული დროით,” - განაცხადა მარიამ ქვრივიშვილმა.
ბიზნესპარტნიორი
ტურიზმი
