აჭარაში, გოდერძის სამთო-სათხილამურო კურორტზე სეზონის დაწყებამდე ორი ახალი სასტუმროს გახსნა იგეგმება, ესენია - „ამბასადორი“ და „ირე პალასი“. თუმცა, როგორც „გოდერძი რეზორტის“ დირექტორი „კომერსანტთან“ აღნიშნავს, რომ არ იყოს სრული ლოქდაუნის მოლოდინი, კურორტი სეზონისთვის მზად არის.
„ორი სასტუმროა, რომლებიც სეზონისთვის გახსნას აპირებენ, თუმცა რამდენად დაამთავრებენ სამუშაოებს ვერ გეტყვით.
მოარული ხმებია, რომ ფართომასშტაბიან კარანტინზე ვაპირებთ გადასვლას, მაგრამ სხვა მხრივ ჩვენ ყველანაირად მზად ვართ.
ჯერ სეზონის გახსნაც როდის იქნება არ ვიცით, ეს დამოკიდებულია პანდემიაზე და თოვლზე. კი გათოვდა, მაგრამ ჯერჯერობით მხოლოდ ხუთი სანტიმეტრია და არ არის საკმარისი სათხილამურო ტრასების გასახსნელად.
შარშან 7 იანვარს გავხსენით კურორტი და იმედია წელსაც ასე არ იქნება,“ - ამბობს „გოდერძი რიზორტის“ დირექტორი მალხაზ მახარაძე.
კურორტ გოდერძზე „ამბასადორის“ ახალი, 5-ვარსკვლავიანი სასტუმრო 2020 წლის ზამთრის სეზონისთვის იგეგმებოდა. სასტუმროს ორივე კორპუსი 215 ნომერს, რესტორნებს, ლაუნჯს, საკონფერენციო სივრცეებს, სპასა და აუზებს აერთიანებს. ასევე ექნება 50 ავტომობილზე გათვლილი პარკინგი და თხილამურების გასაქირავებელი პუნქტი.
კომპანიაში ამბობენ, რომ „ამბასადორ გოდერძის“ მშენებლობისთვის, ჯამში, $30 მილიონის ინვესტიცია განხორციელდება.
ძვირია თუ არა პანდემიისა და კრიზისის გამო დასვენება ზამთრის კურორტებზე და რამდენად ელოდება გოდერძი ადგილობრივ დამსვენებელს? მალხაზ მახარაძე ამბობს, რომ
„სათხილამურო ტრასები მაშინ გაკეთდება, როცა გათოვდება. საბაგიროებს რაც შეეხება, ტექნიკური შემოწმება, როგორც მე ვიცი ჩატარებულია, დამცავი ბადრები გაკეთებულია და ნიშნებიც დაყენებულია, ჩვენ სახელმწიფო სტრუქტურები მზად ვართ და კერძოები რას აპირებენ, ვერ გეტყვით.
რაც შეეხება დასვენებას, შარშან რა ფასებიც იყო, იგივე დარჩა. პროდუქტის გაძვირება მსოფლიოში, სასტუმროს ფასებზე და რესტორნებზე არ იმოქმედებს.
ჩემი ვარაუდით, არ გაძვირებულა სასტუმროს ფასები -50-150 ლარამდეა და „გესთ ჰაუსებს“ რაც შეეხება, ის უფრო იაფია.
უნდა აღვნიშნო, რომ დაინტერესება არის უცხოელებისგანაც კი, დამირეკეს დასაჯავშნად იმ ტურისტებმა ვინც შარშან იყვნენ, 1-2 ჯავშანი უცხოეთიდანაც მივიღე, ალბათ ჩამოვლენ და რვა დღიან კარანტინს გაივლიან“- ამბობს მახარაძე.
რაც შეეხება წყლის შეწყვეტასთან დაკავშირებულ პრობლემებს, რაც გასული სეზონიდან ახსოვს დამსვენებელს , მალხაზ მახარაძის თქმით, მომავალი წლიდან აღნიშნული პრობლემის მოსაგვარებლად 3 მილიონიანი პროექტი განხორციელდება.
„წყლის პრობლემა მოგვარებულია. რაც ახლა არის, ის კიდევ ერთ ორ სასტუმროს აიტანს და მომავალი წლიდან დაგეგმილია პროექტი და 3 მილიონ ლარიანი სამუშაოებია ჩასატარებელი, რომელიც მთლიან სასტუმროს და კიდევ დამატებით 200 ჰა-ს დამატებას ვაპირებთ კურორტზე და იმათ ეყოფათ წყალი. წელს დამატებითი წყლები საკუთარი ხარჯებით დავამატეთ,“- ამბობს „გოდერძი რიზორტის დირექტორი.
აღსანიშნავია, რომ კურორტზე არსებული კოტეჯები სახელმწიფოს საკუთრება აღარაა და ის შპს „ხიდი 2006“-მა შეიძინა, ესაა კომპანია რომელსაც რესტორანი „სანრემო“ ეკუთვნის. ამავე კომპანიაზე გასვისდა სასტუმრო „მეტეო“. ამ ეტაპზე კი 24 ნომრიანი კოტეჯები სართულების დამატებით 48 ნომრითაა წარმოდგენილი.