საქართველოს ტურ-ოპერატორთა ასოციაციის თავმჯდომარე, ია თაბაგარი ადგილობრივ და უცხოელ ინსტრუქტორებს შორის არსებულ კონფლიქტს სოციალურ ქსელში გამოეხმაურა.
მისი თქმით, უცხოელ ინსტრუქტორებს მხოლოდ საერთაშორისო სერტიფიკატით გუდაურში მუშაობის უფლება არ აქვთ.
„არ არსებობს ასეთი პრეცედენტები ხელშეკრულების და გადასახადის გადახდის გარეშე.
გუდაურში მიმდინარე კონფლიქტზე მინდა დავწერო. ადგილობრივი ინსტრუქტორები წინააღმდეგი არიან, რომ უცხოელებმა იქ იმუშაონ და თვლიან რომ პრიორიტეტი უნდა ჰქონდეთ ადგილობრივ ინსტრუქტორებს. ახლა ვუსმინე უცხოელებს, ორივე უტიფრად ამტკიცებს რომ საერთაშორისო სერტიფიკატი აძლევს მათ უფლებას იმუშაონ გუდაურში. ეს არის დიდი ტყუილი, რადგან სერტიფიკატი ამისთვის არ კმარა. ავსტრიის რომელიმე კურორტზე რომ ჩავიდნენ საერთაშორისო სერტიფიკატის მქონე ქართველი გიდები ან ინსტრუქტორები, ვინმე დართავს ნებას რომ იმუშაონ? არ არსებობს ასეთი პრეცედენტები ხელშეკრულების და გადასახადის გადახდის გარეშე.
რუსული სათხილამურო კლუბის გაცემული ფარატინა ფურცელი საკმარისია იმისთვის, რომ ადგილობრივ ახალგაზრდებს შეეზღუდოთ მუშაობის უფლება უთანასწორო კონკურენციაში? მე და ჩემმა გუდაურის მეგობრებმა დიდი ხნის წინ ვივარაუდეთ, რომ კონფლიქტები მოჰყვებოდა გუდაურის ქაოსურ განვითარებას. არაერთხელ შევახსენეთ არაერთ ხელისუფლებას საკითხის დარეგულირება, მაგრამ ყოველთვის არა-სერიოზული დამოკიდებულება იგრძნობოდა. ამის შედეგად მივიღეთ აგრესიული თამაში წესების გარეშე!
ვინმე ადგილობრივ ახალგაზრდებს თუ დააკისრებს შეუფერებელ პასუხისმგებლობას, ეს იქნება დიდი უსამართლობა, როცა კურორტს ადეკვატური რეგულაციები არ გააჩნია და კანონი არ არეგულირებს ვის აქვს მუშაობის უფლება, ვის არა! ჩემი მხარდაჭერა ადგილობრივ ინსტრუქტორებს ჟინვალიდან დარიალის ხეობის უკიდურეს წერტილამდე! P.S. სათხილამურო კურორტი ერთადერთი მიზიდულობაა დღევანდელ რეალობაში, რომელიც ხევის და მთიულეთის ახალგაზრდებს ქვეყნიდან წასვლას გადააფიქრებინებს. ყველა ფაქტორი გაითვალისწინეთ სანამ ღიად გაუღებთ კარს უცხო ქვეყნის მოქალაქეებს და სანამ სასათბურე პირობებს შეუქმნით სათხილამურო კურორტებზე“, - წერს ია თაბაგარი.
საერთაშორისო სათხილამურო ინსტრუქტორებმა განაცხადეს, რომ საქართველოს სამთო - სათხილამურო კურორტ გუდაურში ადგილობრივები სიტყვიერ შეურაცხყოფას აყენებდნენ და მათ ქვეყანაში მუშაობის შესაძლებლობას არ აძლევდნენ.