ბათუმის პორტი რამდენიმე დღეა დიდი რაოდენობის ტვირთების შესვლის გამო გადატვირთულია, რაც ადგილობრივ ლოგისტიკურ ჯაჭვში შეფერხებებს იწვევს. იმპორტიორები აღნიშნავენ, რომ კონტეინერები ვერ იხსნება და ყოველდღიურად ტერმინალში დაყოვნების ჯარიმები ეწერებათ. 

შპს „კარგო პარსელის“ ბათუმის ტერმინალის დირექტორი ირაკლი ღოღობერიძე „კომერსანტთან“ ამბობს, რომ პრობლემა ფაქტობრივად მოგვარებულია და უახლოეს დღეებში მოხდება კონტეინერების გახსნა.

„ბათუმის საკონტეინერო ტერმინალში  წინასაახალწლო პერიოდიდან გამომდინარე ტვირთბრუნვა ყოველთვის იმატებს, წელს ისედაც გაზრდილი ნაკადების გამო, ამ პერიოდში დიდი რაოდენობით ტვირთი შემოვიდა და ნამდვილად კოლაფსი იყო, თუმცა ჩვენსა და ბათუმის პორტს შორის მოხდა შეთანხმება და მათი კონტეინერების დიდი ნაწილი ჩვენს ტერმინალზე გადმომისამართდა. ამით გამოუთავისუფლდათ ადგილი და სასაწყობე ფართის დეფიციტი რაც არსებობდა, უკვე თითქმის აღარ არის, ამიტომ მათ შეუძლიათ ახალი კონტეინერები მიიღონ. უახლოეს დღეებში სიტუაცია განიმუხტება, ბათუმის პორტის კოლაფსის პრობლემა თითქმის მოგვარებულია და კონტეინერების გახსნა დაიწყება.  დღევანდელი მდგომარეობით დაახლოებით 300-მდე კონტეინერი უკვე მიღებული გვაქვს და ეს პროცესი არ წყდება. ბათუმის პორტს სხვა ხაზებიც დაემატა, შესაბამისად ტვირთბრუნვაც გაიზარდა“, — აღნიშნავს ირაკლი ღოღობერიძე.

„კავკასუს ავტოიმპორტში“ აცხადებენ, რომ პორტი ორ მსხვილ საზღვაო ხაზს: MSC-ს და COSCO (China Shipping) - ს ემსახურება. მიღებული ტვირთი კი აღემატება ბათუმის პორტის წარმადობას. ამ ყველაფრის ერთ-ერთი მთავარი მიზეზი რეგიონში ექსპორტის მიმართ მოთხოვნის მკვეთრი ზრდაა. მათი ინფორმაციით, საზღვაო ხაზები კონტეინერების დაყოვნებისთვის დამკვეთებს ჯარიმებს აკისრებენ, რაც მათი კომპანიის შემთხვევაში უკვე 300 000 ლარს სცდება, „კავკასუს ავტოიმპორტის“ ასობით კონტეინერი გახსნის მოლოდინშია.

მიმდინარე წელს საქართველოს ნავსადგურებში გადამუშავებული ტვირთის მოცულობა 10%-ით გაიზარდა. 32%-ით არის გაზრდილი გადამუშავებული ნაყარი ტვირთების, 5%-ით კი გენერალური ტვირთების მოცულობა. საზღვაო ტრანსპორტის სააგენტოს ინფორმაციით, ყველა ტვირთის შემთხვევაში მატება ფიქსირდება როგორც ფოთის, ისე ბათუმის ნავსადგურებში.  2022 წლის პირველ ნახევარში ბათუმის პორტში გატარებული ტვირთები 2.5 მილიონი ტონას აღემატებოდა, მატება წინა წელთან 0.7 მილიონი ტონაა.