ზაფხულის ერთ-ერთი ყველაზე დიდი პრობლემა საზოგადოებისა და გარემოსთვის - ტყის ხანძრებია. ბოლო რამდენიმე წელია, რაც სეზონის დაწყებისთანავე ტყის ხანძრებთან გასამკლავებლად აუცილებელი ხდება ყველა შესაძლო რესურსის მობილიზება. „კომერსანტი“ დაინტერესდა, რამდენად არის სახელმწიფო მზად ტყის ხანძრებისთვის, რას აკეთებს მისი პრვენციისთვის და რა რესურსს ფლობს საამისოდ.
როგორც შინაგან საქმეთა სამინისტროს საგანგებო სიტუაციების მართვის სამსახურში გვითრხეს, საგანგებო სიტუაციების მართვის სამსახურის სახანძრო-სამაშველო ძალების დეპარტამენტის ტერიტორიული დანაყოფები მჭიდროდ თანამშრომლობენ სახელმწიფო ტყის ფონდის მართვის ორგანოებთან, ასევე მუნიციპალიტეტის ორგანოებსა და სახელმწიფო რწმუნებულებს წარუდგენენ წინადადებებს და რეკომენდაციებს საგანგებო სიტუაციის პრევენციის, სახანძრო უსაფრთხოების მოთხოვნებისა და უზრუნველყოფის ღონისძიებების განხორციელების თაობაზე.
მათივე ინფორმაციით საგანგებო სიტუაციების მართვის სამსახური მოსახლეობის ცნობიერების ამაღლების მიზნით გუბერნატორების ადმინიატრაციისა და მუნიციპალიტეტის ხელმძღვანელ პირებთან საკონსულტაციო შეხვედრებს ატარებს და ზაფხულის სეზონზე ტემპერატურის მკვეთრი მატების პირობებში ფართომასშტაბიანი ხანძრების თავიდან აცილების მიზნით ხანძარსაწინააღმდეგო მონიტორინგს ატარებს.
„სახანძრო-სამაშველო ძალების დანაყოფების მიერ ყოველდღიურად, დღეში ორჯერ, ხორციელდება იმ ტერიტორიების მონიტორინგი, რომლებიც წარმოადგენენ ხანძარსაშიშ ზონებს.
რაც შეეხება სპეცტექნიკის ავტოპარკს და მის განაწილებას რეგიონების მიხედვით, საგანგებო სიტუაციების მართვის სამსახურის ბალანსზე ირიცხება ძირითადი სახანძრო ავტომობილები, რომლებიც გამავლობის მიხედვით იყოფა 3 კატეგორიად:
I კატეგორია - სახანძრო ავტომობილი არასრული ამძრავით მყარი საფარის მქონე გზებისთვის;
II კატეგორია - სახანძრო ავტომობილი სრული ამძრავით (მომეტებული გამავლობის), ყველა ტიპის გზაზე გადასაადგილებლად;
III კატეგორია - ყველგანმავალი (მაღალი გამავლობის) სახანძრო ავტომობილი რთულ რელიეფზე გადასაადგილებლად.“ - ნათქვამია საგანგებო სიტუაციების მართვის სამსახურის ინფორმაციაში
უწყებაში აცხადებენ, რომ მათ ბალანსზე ირიცხება 160 ერთეული მაღალი გამავლობის ავტომობილი, რომლებიც სამსახურის სახანძრო-სამაშველო დანაყოფებში რეგიონის რელიეფის სირთულისა და მოსახლეობის სიმჭიდროვის მიხედვით არის გადანაწილებული და გამოიყენება როგორც ტყის ხანძრების, ასევე რთულ რელიეფზე გავრცელებული ხანძრების სალოკალიზაციო/სალიკვიდაციო სამუშაოების დროს.
„სსიპ სახელმწიფო სამხედრო სამეცნიერო-ტექნიკურ ცენტრ „დელტა-სგან საგანგებო სიტუაციების მართვის სამსახურმა მიიღო 2 ერთეული სახანძრო-სამაშველო მანქანა. აღნიშნული ავტოსატრანსპორტო საშუალებები შექმნილია არა ტყეში რთულად მისადგომ ადგილებზე ცეცხლის ჩასაქრობად, არამედ წარმოადგენს სწრაფი რეაგირების მულტი ფუნქციურ მცირე სახანძრო-სამაშველო ავტოსატრანსპორტო საშუალებებს“, – აცნობეს კომერსანტს უწყებიდან.
საგანგებო სიტუაციების მართვის სამსახური მოსახლეობას მეტი სიფრთხილისკენ მოუწოდებს და სთხოვს, რომ პიკნიკების მოწყობის ადგილებში არ დატოვონ ცეცხლის კერები, რადგან არ მოხდეს უკონტროლო და მასშტაბური ტყის ხანძრების გავრცელება. გარდა ამისა, საგანგებო სიტუაციების მართვის სამსახური მოსახლეობას სთხოვს, რომ სასოფლო-სამეურნეო სავარგულების დასუფთავების დროს გამოიჩინონ მაქსიმალური ყურადღება და დაიცვან სახანძრო უსაფრთხოების ყველა წესი, ხოლო კვამლის ან ცეცხლის აღმოჩენის შემთხვევაში დაუყოვნებლივ დარეკონ 112-ში.
თაკო კვაჭანტირაძე