საქართველოს პარლამენტმა, 2020 წლის მაისში დაამტკიცა ტყის ახალი კოდექსი, რომლითაც იქმნება საფუძველი სოციალური ჭრის ეტაპობრივი გაუქმებისა და მდგრადი სატყეო მეურნეობების ჩანაცვლებისთვის;  უქმდება ხე-ტყის დამზადების გრძელვადიანი ლიცენზირების სამართლებრივი საფუძვლები, შეიქმნება ტყის საკუთრების ახალი ფორმები, შესაძლებელი გახდება ტყეებით მრავალმიზნობრივი სარგებლობა, მათ შორის,  ტყეების სარეკრეაციო და საკურორტო მიზნით გამოყენება.  ნიშნავს თუ არა ეს ცვლილებები სოციალური ჭრის საბოლოოდ შეზღუდვას და რა ალტერნატივა აქვს მოსახლეობას, რომელსაც აქამდე ტყის რესურსებზე ხელმისაწვდომობა ჰქონდა. „კომერსანტმა“ განმარტებისთვის სატყეო სააგენტოს მიმართა. ტყითსარგებლობის დეპარტამენტის უფროსი ზურა ყელიხაშვილი გვიყვება, რომ მოსახლეობას საკუთარი ძალებით რესურსის დამზადება ტყეკაფისგან 2023 წლამდე შეეძლება, პარალელურად კი საქმიან ეზოებში შეძლებენ რესურსის შეძენას, კანონის მიზანი კი მოსახლეობისთვის პროცესის გამარტივება იყო.

„შეზღუდვა არ დაგვიწესებია, კანონი ამბობს, რომ თუ გნებავთ საქმიან ეზოში მიდით, თუ არა და დაამზადე შენი ძალებით. 2023 წლამდე ამ კანონმა დატოვა შესაძლებლობა, რომ სოციალური ჭრისთვის ტყეკაფები იყოს გამოყოფილი და მოსახლეობას ჰქონდეს საშუალება, საკუთარი ძალებით მოახდინონ ტყეკაფზე  რესურსის დამზადება. პარალელურად, ჩვენ ვაშენებთ საქმიან ეზოებს ყველა რეგიონში, სადაც შეშაც და მასალაც იქნება დასაწყობებული და მოსახლეობას არ მოუწევს ტყეში წასვლა. მსურველი მოვა საქმიან ეზოში , შეიძენს სასურველ რესურსს და მოახდენს მის ტრანსპორტირებას. მომსახურებაში ჩადებულია ტრანსპორტირებაც სურვილის შემთხვევაში. თუ ამის საშუალება მას არ აქვს, შეუძლია მივიდეს ტყეში 2023 წლამდე და დაამზადოს ეს რესურსი თავისი ძალებით. ეს მოსახლეობისთვის შრომის გამარტივებაა - მანქანის რესურსი, მომსახურების რესურსი - მინიმუმ 200 ლარი მაინც დასჭირდებათ. კეთილმოწყობილ ეზოებში მივლენ აარჩევენ, გადაიხდიან ამის ფასს. მომავალში სატყეო მეურნეობების განვითარება მოხდება, ამას დამატებითი ფინანსური რესურსი სჭირდება, თანამშრომლების გადამზადება სჭირდება და მთელი სისტემის შემუშავება.  ვფიქრობთ, რომ ეტაპობრივად განვახორციელებთ, რაც აბსოლუტურად აპრობირებული იქნება“, - ამბობს ტყითსარგებლობის დეპარტამენტის უფროსი ზურა ყელიხაშვილი.

2023 წლამდე ნარჩუნდება სტატუსკვო, თუმცა ცალკეულ მუნიციპალიტეტებში, სადაც ახალი სერვისის მიწოდება შესაძლებელი იქნება, მოქალაქეებს ამ ალტერნატივით სარგებლობაც შეეძლებათ. რაც შეეხება ტარიფებს, გადასახადი 1 კუბურ მეტრზე 6 ლარი, უცვლელი დარჩება. დაიშვა ტყის რესურსების კომერციული მიზნით სარგებლობაც. კენკრისა და ნებისმიერი ტყის პროდუქტის კომერციალიზაციის მსურველები ერთ წლიანი სეზონური ნებართვის მიღებას, გარკვეული პირობებით, სატყეო სამსახურებიდან შეძლებენ.

კომერსანტი