ტყავისა და ტყავის შემცვლელი პროდუქციის დუბაის საერთაშორისო გამოფენა APLF 2022 დაახლოებით ერთ თვეში გაიმარტება. მსოფლიოს მასშტაბით ერთ-ერთ ყველაზე მნიშვნელოვან ღონისძიებას საქართველოდან სულ რამდენიმე კომპანია, მათ შორის, Gepherrini (,,გეფერინი“)  წარადგენს, რომელიც უცხოურ ბაზარზე უკვე კარგად ნაცნობი ბრენდია. კომპანიის დამფუძნებელი ილია გეფერიძე მზად არის ახალი გამოწვევებისთვისაც, რა მოლოდინიც  მას საერთაშორისო გამოფენის მიმართ აქვს.              

როგორც ილია გეფერიძემ ,,კომერსანტთან“ აღნიშნა, პანდემიურ პერიოდში მისთვის ეს პირველი მასშტაბური გლობალური გამოფენაა. სააგენტოც „აწარმოე საქართველოში“ მხარდაჭერით,  მსგავს გამოფენაში იგი მონაწილეობდა  2018-2019 წლებშიც,  რომლის ფარგლებშიც მნიშვნელოვანი კონტაქტები დაამყარა საერთაშორისო მყიდველებთან ე.წ „buyer”-ებთან. სწორედ ამ ღონისძიების შედეგად, შპს Gepherrini-ს და კომპანია „InterBlock Hong Kong Limited” შორის წარმატებული კონტრაქტი გაფორმდა, რომლის ფარგლებშიც ქართულმა კომპანიამ ჰონგ-კონგის ერთ-ერთ ყველაზე ცნობილ სავაჭრო ცენტრში კუნძულის ტიპის მაღაზია გახსნა.

,,ტყავის და ტყავის შემცველი პროდუქციის საერთაშორისო გამოფენაზე ქართული კომპანიები მონაწილეობას ,,აწარმოე საქართველოში“ დაფინანსებით მივიღებთ. ონლაინ სერვისებს თუ არ ჩავთვლით, გლობალურ გამოფენებში მონაწილეობის საშუალება არ გვქონია 2019 წლის შემდეგ, კორონავირუსმა ამის შესაძლებლობა მაქსიმალურად შეზღუდა. მოლოდინი დიდია, მით უმეტეს, კოვიდური სიტუაცია მეტნაკლებად გაუმჯობესებულია. დიდ იმედს ვამყარებთ დუბაის გამოფენაზე, გვექნება პოტენციური პარტნიორების გაცნობის რეალური შესაძლებლობა და ჩვენი პროდუქციით კიდევ მეტი ადამიანი დაინტერესდება. წინა გამოფენებიდან ახალი ხელშეკრულებებით დავბრუნდით და ახლაც იმედიანად ვართ განწყობილი, დანარჩენს დრო და შესაძლებლობა გვიჩვენებს“, - ამბობს ილია გეფერიძე ,,კომერსანტთან“.

ცნობისთვის, ტყავის პროდუქციის მწარმოებელი კომპანია Gepherrini ქართულ ბაზარზე 2014 წლიდან გამოჩნდა. ტრადიციული ორნამენტებით გაწყობილმა, გეომეტრიული დიზაინის ჩანთებმა დაინტერესება არა მხოლოდ ადგილობრივ ბაზარზე, არამედ მსოფლიოს მრავალ ქვეყანაში გამოიწვია.

ქართული ბრენდის პროდუქცია წარმატებით იყიდება ამერიკის შეერთებულ შტატებში, საფრანგეთში, უკრაინაში, ყაზახეთში, შვედეთში, ჩინეთში და კიდევ რამდენიმე ქვეყანაში. კომპანიას ჯამში, 42 სარეალიზაციო წერტილი აქვს. მათ შორის, ფლობს 4 საკუთარ მაღაზიას საქართველოში და 7-ს საზღვარგარეთ.

როგორც Gepherrini-ს დამფუძნებელი ამბობს, დუბაის საერთაშორისო გამოფენაზე მონაწილეობა კიდევ ერთი შანსია, დაამყარონ მნიშვნელოვანი ბიზნეს კავშირები და აითვისონ ახალი საექსპორტო ბაზრები.

მარი ჩიტაია