2021 წელი თხილის ექსპორტისთვის მეტნაკლებად სტაბილური აღმოჩნდა. ამ დროისთვის მოსავლის დაახლოებით 60-70% ექსპორტირებულია და პროდუქტი სრულად მიმდინარე წლის პირველ კვარტალში გაიყიდება. თხილის მწარმოებელი და ექსპორტიორი კომპანია Nuts.ge-ს დამფუძნებელი მამუკა ბერიაშვილი ,,კომერსანტთან“ ამბობს, რომ 2020 წელი მსოფლიო ბაზრისთვის საკმაოდ რთული იყო, პანდემიით გამოწვეული შოკური ფაქტორებიდან გამომდინარე, რაც მომდევნო წელს მეტნაკლებად შემცირდა და ბაზარი უფრო სტაბილური გახდა.

,,2021 წელს თხილის მოსავლის რაოდენობა და ექსპორტიც გაიზარდა. გარდა იმისა, რომ ბოლო პერიოდში ფაროსანასთან დაკავშირებული პრობლემები დიდწილად მოგვარებულია, შოკური ფაქტორებიც აღარ არის ისეთი, რაც პანდემიური ვითარების გამო 2020 წელს იყო. ჩვენი ინფორმაციით, ამ დროისთვის თხილის დაახლოებით 60-70% ექსპორტზეა გასული. გარკვეული ზრდის მიუხედავად, გამოწვევები მაინც რჩება, თუნდაც იქიდან გამომდინარე, რომ პანდემია ისევ გრძელდება და ლოგისტიკაც ახლებურად გადაეწყო, ეს ეხება როგორც ფასებს, ასევე გლობალურ ბაზრებზე შექმნილ სიტუაციას. ქართული თხილის შემთხვევაში, მნიშვნელოვნად ვართ დამოკიდებული თურქეთის ბაზარზე. იქ ბაზარი ლირის კურსზეა დამოკიდებული, ასევე მოსავლის რაოდენობაზე, ამაზეა მიბმული თხილის ფასიც. საექსპორტო ღირებულება ამ ეტაპზე 6 დოლარის ფარგლებშია. ლოგისტიკური პროცესების პარალელურად თხილზე ფასი საშუალოდ 1-1.5 დოლარით შემცირდა, თუმცა მთლიანობაში სეზონი სტაბილურია, მით უმეტეს პანდემიური ვითარების ფონზე, რაც ჯერჯერობით  გამოწვევად რჩება“, - ამბობს მამუკა ბერიაშვილი ,,კომერსანტთან“.

ცნობისთვის, კომპანია Nuts.ge საქართველოში, კონკრეტულად კი ზუგდიდსა და ყვარელში თხილის გადამამუშავებელ 2 საწარმოს მართავს, რომელთა წლიური წარმადობა 3 000 ტონა მზა თხილია.

კომპანია თხილის რეალიზებას 25 ქვეყანაში, თითქმის ყველა კონტინენტზე ახორციელებს.

რაც შეეხება თხილის ექსპორტს, 2021 წლის 1-ლი აგვისტოდან 2022 წლის 9 იანვრის ჩათვლით საქართველოდან 17.8 ათასი ტონა თხილის ექსპორტი განხორციელდა, რომლის ღირებულებამ  81.1 მლნ აშშ დოლარი შეადგინა. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

გასული წლის ანალოგიურ პერიოდთან შედარებით, ექსპორტირებული თხილის მოცულობა 3.8 ათასი ტონით (28%), ხოლო ღირებულება 7.7 მლნ აშშ დოლარით (10%) გაიზარდა.

მარი ჩიტაია