საქართველოდან საზღვაო გზით გასატანი, შესაბამისი წესით დეკლარირებული საქონლის საბაჟო საწყობიდან ნავსადგურში გადაზიდვის ვადა 12 საათიდან 24 საათამდე გაიზარდა. შემოსავლების სამსახურის ინფორმაციით, გადასაზიდი ტვირთის აღრიცხვა ხორციელდება გამარტივებული წესით და არ საჭიროებს დალუქვას საბაჟო საწყობიდან ნავსადგურში ტრანსპორტირების პროცესში.
შპს „კარგო პარსელის“ ბათუმის ტერმინალის დირექტორი ირაკლი ღოღობერიძე „კომერსანტთან“ ამბობს, რომ აღნიშნული ცვლილების შედეგად ტვირთების გადაზიდვის დღიური ნორმა გაოთხმაგდა, რაც არსებული გაზრდილი ტვირთბრუნვის ფონზე, ძალიან მნიშვნელოვანია.
„ჩვენ ვფლობთ საბაჟო საწყობს ბათუმის პორტის მიმდებარე ტერიტორიაზე და დღემდე, საკანონმდებლო ცვლილებების შესვლამდე, გადასაზიდი ტვირთის აღრიცხვა საჭიროებდა დალუქვას ჩვენი საწყობიდან ნავსადგურში ტრანსპორტირების პროცესში, ცვლილების შემდეგ ფაქტობრივად გავაოთხმაგეთ ტვირთების გადაზიდვის დღიური ნორმა. მაშინ როდესაც დღიური ნორმა იყო საშუალოდ 450-დან 500 ტონამდე, ახლა 2000 ტონამდე ავედით და შედეგად შექმნილი ტვირთნაკადების გაზრდილი რაოდენობის ფონზე, ეს უმნიშვნელოვანესია. მოგეხსენებათ, საქართველოს დღეს მიეცა შანსი, რომ გაათმაგოს ტვირთბრუნვა და ამისთვის საჭიროა ქვეყანაც მზად დახვდეს ამ ვითარებას, შესაბამისად მნიშვნელოვანია მსგავსი საკანონმდებლო ცვლილებები.
რაც შეეხება გაზრდილ ტვირთბრუნვას, მაგალითად ჩვენს შემთხვევაში უნდა აღინიშნოს, რომ ივნისში 100%-ით მეტი ტვირთი გავატარეთ, ვიდრე წინა თვეებში. მოლოდინიც ოპტიმისტურია და ვფიქრობთ, რომ ეს დინამიკა მზარდი იქნება და მომავალშიც შევინარჩუნებთ არსებულ ნაკადებს, მითუმეტეს რომ ფორმალური მხარეები უფრო გამარტივდა“, — აღნიშნა ირაკლი ღოღობერიძემ.
შემოსავლების სამსახურში განმარტავენ, რომ საკანონმდებლო ცვლილებები მნიშვნელოვნად შეამცირებს გემების მოცდენის, ასევე ტვირთების საერთაშორისო გადაზიდვასთან დაკავშირებული სატვირთო და ლოგისტიკური ოპერაციებისათვის საჭირო დროს. ამასთან, გაიზრდება ქვეყნის, როგორც სატრანზიტო დერეფნის პოტენციალი და შესაძლებელი იქნება იმ გამოწვევებთან გამკლავება, რაც განპირობებულია გაზრდილი ტვირთბრუნვით.