თურქული ლირა გაუფასურებას განაგრძობს. 26 ოქტომბერს პირველად დენომინაციის შემდეგ დოლარის ღირებულება 8.00-იან ნიშნულს გადასცდა. Bloomberg-ის სავაჭრო პლატფორმაზე თბილისის დროით 12:00-ზე კურსი 8.05-ს შეადგენს.
ლირის გაუფასურება არც დღეს დაწყებულა და არც გუშინ. 2005 წლის 1-ელ იანვარს კურსი 1.33-ს შეადგენდა, 2010 წლის 1-ელ იანვარს 12%-ით მეტს - 1.49-ს. 2015 წლის 1-ელ იანვარს უკვე 64%-ით მეტს - 2.44-ს. ამ დროიდან გაუფასურების ტემპი მატულობს. იმავე 2015 წელს დოლარის ღირებულება პირველად გადასცდა 3.00-იან ნიშნულს. შემდგომ სამწლიანი მეტნაკლები სტაბილურობის შემდეგ 2018 წელს კურსმა 6.00-იან ნიშნულსაც გადააჭარბა. 2020 წელს კი ჯერ 7.00-ს და ახლა უკვე 8.00-ს.
ბოლო 5 წელი თურქეთისთვის მარტივი არ ყოფილა. 2015 წელს საჰაერო სივრცის დარღვევის გამო, რუსული თვითმფრინავის ჩამოგდების შედეგად ორ ქვეყანას შორის ურთიერთობა მნიშვნელოვნად დაიძაბა. 2016 წელს გადატრიალების უშედეგო მცდელობის შემდეგ ურთიერთობა აშშ-სთანაც გაუარესდა. ერდოღანი ვაშინგტონისგან დღემდე ითხოვს გადატრიალების მცდელობის ორგანიზატორობაში ბრალდებულ გიულენის გადაცემას. ეს კი დაპირისპირების ერთადერთი მიზეზი არ არის. მათი ინტერესები სირიაშიც ქურთთა საკითხთან მიმართებაშიც გადაიკვეთა, რასაც ანკარის მიერ რუსული S400-ების შეძენა მოჰყვა. საპასუხოდ ვაშინგტონმა თურქეთისთვის მეხუთე თაობის მრავალფუნქციური გამანადგურებლების F35-ების მიყიდვა დაბლოკა.
პოლიტიკურმა განწყობებმა გავლენა ეკონომიკაზეც იქონია. 2018 წელს თუქეთის ეკონომიკური ზრდის ტემპი 2.8%-მდე შემცირდა, 2019 წელს 0.9%-მდე.
თურქული ლირა ის იშვიათი გამონაკლისია, რომელთა მიმართებაშიც ლარი გამყარდა. თუ წლის დასაწყისსი 1 ლირა 48 თეთრი ღირდა, ახლა 40 თეთრი ღირს.
გიორგი ელიზბარაშვილი