ინფლაციის მხრივ რეგიონში ყველაზე მძიმე ვითარება თურქეთში ნარჩუნდება, სადაც სამომხმარებლო ფასების ზრდის ტემპმა, ძირითადად სურსათისა და ენერგორესურსების გაძვირების გამო 61%-ს მიაღწია. ინფორმაციას ამის შესახებ Financial Times ავრცელებს.

ინფლაცია კურსის ვარდნასთან ერთად თურქეთის ერთ-ერთი მნიშვნელოვანი პრობლემაა, რომელიც 2021-2022 წლებში განსაკუთრებით გამწვავდა. გასული წლის დეკემბერში დოლარის ღირებულებამ 16 ლირას გადააჭარბა, რაც 125%-იან ვარდნას ნიშნავდა, თუმცა მალევე ფასი 11 ლირამდე შემცირდა დღეს კი 14.7 ლირაა, ეს კი თავის მხრივ გასული წლის ანალოგიურ პერიოდთან შედარებით 80%-ით მეტი, 2005 წლის დენომინაციის პერიოდის წერტილთან შედარებით კი 900%-ით მეტია.

ქვეყანაში მწვავედ დგას ინფლაციის საკითხიც. 1977 წლიდან 2003 წლამდე ინფლაციის განაკვეთი თითოეულ წელს 25%-ს აღემატებოდა, მათ შორის 15-ჯერ 60%-ს, 6-ჯერ 80%-ს, 1994 წელს კი 100%-საც გადააჭარბა. 2004 წლიდან სიტუაცია შედარებით დასტაბილურდა, თუმცა ეს დასტაბილურება 7-8 პროცენტიან ინფლაციას ნიშნავდა. 2018-2019 წლებში ინფლაციამ 15%-ს ისევ გადააჭარბა, 2020 წელს 12%-მდე შემცირდა, 2021 წლის დეკემბერში 36%-ს მიაღწია, 2022 წლის იანვარში 49%-ს, თებერვალში 54%-ს, ხოლო მარტში 61%-ს.

სურსათი თურქეთში 70%-ით, ხოლო ენერგორესურსები 103%-ით გაძვირდა. ცენტრალური ბანკის პრეზიდენტის, ფინანსთა მინისტრისა თუ სტატისტიკის სამსახურის ხელმძღვანელის მოხსნამ კრიზისი ვერ განმუხტა.

თურქეთი საქართველოს #1 სავაჭრო პარტნიორი და მისი წილი იმპორტში 16.6%-ს შეადგენს. ფასების მკვეთრ ზრდას ნაწილობრივ ადგილობრივი ვალუტის გაუფასურება აბალანსებს.