ფარმაცევტები მთელ თურქეთში გაფიცვისთვის და მოგების დაბალი მარჟის გასაპროტესტებლად ემზადებიან, რომელიც ფარმაცევტული ფასების დადგენილების ფარგლებში ბოლოს ივლისში განახლდა, იტყობინება Deutsche Welle.
აღნიშნულმა განახლებამ გაზარდა ფარმაცევტების მოგება 100 ლირამდე ღირებულების მედიკამენტებიდან 25%-დან 28%-მდე, ხოლო 200 ლირაზე მეტი ღირებულების მედიკამენტებიდან 12%-დან 13%-მდე. მათი მოგების ზრდამ ვერ დააკმაყოფილა თურქეთის ფარმაცევტები მოთხოვნები, სადაც ოფიციალური მონაცემებით, ივლისში ინფლაცია 79,60%-მდე გაიზარდა.
„ყოველი მეორე აფთიაქი [თურქეთში] დახურვის საფრთხის ქვეშაა. განახლებამ არ დაგვაკმაყოფილა, რადგან არ ითვალისწინებდა ინფლაციას“, - განაცხადა სტამბოლის ფარმაცევტთა პალატის თავმჯდომარემ პინარ ოზქანმა.
შეგახსენებთ, რომ თურქეთის მთვრობის გადაწყვეტილებას გარკვეული შიშები მოყვა საქართველოშიც, რომელმაც თურქული მედიკამენტებისთვის ბაზარი რამდენიმე თვის წინ გახსნა.
„საუბარი იმაზე, რომ თურქეთიდან შემოტანილი მედიკამენტები გაძვირდება და ძველ ნიშნულს დაუბრუნდება, არის სპეკულაცია და არ შეესაბამება სიმართლეს“, - განაცხადა მაშინ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე ილია ღუდუშაურმა.
მისი განმარტებით, თურქეთში, მთავრობის გადაწყვეტილებით, ფარმაცევტული კურსი დაკორექტირდა, რამაც შესაძლოა მცირე გავლენა იქონიოს თურქეთიდან იმპორტირებული მედიკამენტების ფასზე და მნიშვნელოვან ცვლილებას არ ველოდებით. ამის საფუძველს გვაძლევს ის გარემოებაც, რომ 2022 წლის თებერვალში ანალოგიურ კორექტირებას ჰქონდა ადგილი, რასაც საქართველოში თურქეთიდან შემოტანილ მედიკამენტების ფასებეზე გავლენა არ მოუხდენია. თურქეთში ფარმაცევტული კურსის დაკორექტირებით არ დაიკარგება ის ეფექტი, რაც საქართველოში თურქეთიდან შემოსული მედიკამენტების ფასებთან დაკავშირებით მივიღეთ.
„მნიშვნელოვან ცვლილებებს არ ველოდებით. ის ეფექტი, რომელიც წლის დასაწყისში, თურქული ბაზრის გახსნით მივიღეთ საქართველოში მედიკამენტების ფასებთან მიმართებაში, არ დაიკარგება.
თურქეთიდან შემოტანილი მედიკამენტები კვლავ მნიშვნელოვნად იაფი იქნება, ვიდრე ეს იყო წლის დასაწყისში. ვფიქრობ, საუბარი იმაზე, რომ თურქეთიდან შემოტანილი მედიკამენტები გაძვირდება და ძველ ნიშნულს დაუბრუნდება, არის სპეკულაცია და არ შეესაბამება სიმართლეს”- განაცხადა ილია ღუდუშაურმა.