„ძირითადად ორიენტირებული ორგანიზაციებზე ვიყავით და მათთვის ვაწარმოებდით ავეჯს, ამ მიმართულებით პრაქტიკულად შეჩერდა შეკვეთები. ძალიან გაძვირდა მასალები, გასულ ორშაბათსაც დამირეკეს და მითხრეს, რომ 15 პროცენტით გაძვირდა იმპორტირებული მასალები, რომელიც მანამდე ისედაც ბევრჯერ გაძვირდა,“ - ავეჯის მწარმოებელი კომპანია „კასა ვერდე“-ს დამფუძნებელი და დირექტორი დავით ბაჩილავა „კომერსანტთან“ საუბრობს პანდემიითა და თურქული კომპანიების არაჯანსაღი კონკურენციით გამოწვეულ სიძნელეებზე ავეჯის წარმოების ბიზნესში. მისი შეფასებით, დღეს მასალების გაძვირების გამო, მოსახლეობა უარს ამბობს ხის მასალებით დამზადებული ავეჯის შეძენაზე, ხოლო „კასა ვერდეს“ მოგება 15 დან 7 პროცენტამდე შემცირდა.

იმდენად მაღალ ფასებზე ავიდა სამუშაო მასალების ღირებულება, რომ კერძო შემსყიდველიც უარს ამბობს ავეჯის შეძენაზე. შემოსავალმაც იკლო - თუ ადამიანს ეგონა რომ 30 000-ად 3 ოთახს გაარემონტებდა, ახლა იგებს, რომ ამ ფასად მხოლოდ 2 ოთახს გაარემონტებს.

ავეჯის ფასის გაძვირებაც რთულია, თუ მოგება 15 ან 20 პროცენტი უნდა დამრჩენოდა, ის ჩამოვიყვანე 7 პროცენტზე, შევამცირე თანამშრომლების რაოდენობა. ისე გამოდის, რომ ჩვენ მოვიკელით, რომ არ დავიხუროთ და კლიენტები შევინარჩუნოთ. დახურვაც არ მინდა, რადგან უართყოფითად აისახება ბიზნესზე, ამიტომ ვცდილობთ არ გავჩერდეთ.

ყველაფრის გაძვირების გამო იძულებული გახდა კლიენტი უფრო იაფ მასალაზე გადავიდეს, ადრე ორიენტირებული ვიყავი ხის ავეჯზე, ახლა უფრო სხვა ტიპის მასალებს ირჩევენ. რესტორნები,სასტუმროები ძირითადად დახურულია და ვინც მუშაობს ფულის დაზოგვას ცდილობს და თავს იკავებს. თურქეთიდან შემოსულ იაფ პროდუქციას კონკურენციას ვერ ვუწევთ და ეს გასაგებიცაა, ჩვეულებრივი ამბავია.“ - ამბობს დავით ბაჩილავა.

მარიამ მორგოშია