მეფრინველეობის დარგი გაკოტრების წინაშეა, ფერმერების ინფორმაციით, ქვეყანაში ქათმის ხორცის ბაზრის 70% იმპორტულ პროდუქციას უჭირავს. ამის არაერთი მიზეზი სახელდება, მათ შორისაა, ბოლო წლების განმავლობაში, ლარის კურსის ზრდა, ენერგომატარებლების გაძვირება, დღგ-ს გადასახადი, რომელსაც მეფრინველეობის დარგი იხდის და სხვა. „კომერსანტი“ დაინტერესდა რა გამოწვევები აქვს ქვეყანაში მეფრინველეობის დარგს.
კომპანია „ჩირინას“ დამფუძნებელი, რევაზ ვაშაკიძე იმპორტირებული ქათმის ხარისხზე საუბრობს და აცხადებს, რომ თურქეთიდან შემოსული პროდუქტი არის დაბალი ხარისხის და შესაბამისად დაბალი ფასის. რევაზ ვაშაკიძის განმარტებით, იმპორტირებული დაბალი ხარისხის ხორცი უვნებელი არ არის და მაღაზიებში არ უნდა იყიდებოდეს.
„რა პროდუქტიც ევროკავშირში შედის იგივე უნდა შემოდიოდეს ჩვენთანაც, საუბედუროდ, ეს ესე არ არის. ქათმის იმპორტი ისეთი ქვეყნებიდან როგორიც არის უკრაინა, ბრაზილია და ევროკავშირის ქვეყნები, არის ცოტა, მაგრამ პროდუქტის იმპორტი გაზრდილია თურქეთიდან. პროდუქცია, რომელიც შემოდის მესამე და მეოთხე კატეგორიის ქათამია, რომელიც თურქეთში არ იყიდება. სახელმწიფოს მხრიდან, ამ მხრივ არანაირი შეზღუდვები არ არის. რასაკვირველია შეზღუდვები უნდა დაწესდეს. თუ ავიღებთ მეფრინველეობას, საქართველოში პროდუქტი თურქეთიდან, ჩინეთიდან და სხვა ქვეყნებიდან შემოდის, შესაბამისად, ჩვენი მეფრინველეობის დარგი ითხოვს სტანდარტიზაციას ევროკავშირთან, ამიტომ შეიძლება ჩვენი პროდუქტი უფრო ძვირი აღმოჩნდეს ვიდრე იმპორტირებული პროდუქტი. ამ შემთხვევაში ჩვენ უნდა მოვიქცეთ ის, რომ ადვილი არ იყოს უხარისხო ქათმის საქართველოში შემოტანა“, - განმარტავს რეავზ ვაშკიძე.
კიდევ ერთი პრობლემა, რომელზეც რევაზ ვაშაკიძე ყურადღებას ამახვილებს, სახელმწიფოს მხრიდან გამოცხადებული ტენდერებია. როგორც ბიზნესმენი განმარტავს სახელმწიფო შესყიდვებში უპირატესობა უცხოურ კომპანიებს ენიჭებათ, ქართული წარმოება კი წახალისებული არ არის, ეს მაშინ, როდესაც სოფლის მეურნეობა საქართველოს მთავრობამ პრიორიტეტულ დარგად გამოაცხადა.
„ჩვენ მსხვილი გადამხდელი ვართ, სახელმწიფო უწყებები კი რატომღაც ყიდულობენ არა საქართველოში, არამედ სხვა ქვეყანაში წარმოებულ პროდუქციას. მაგალითისთვის შემიძლია გითხრათ, რომ თავდაცვის სამინისტრომ გამოცხადა ტენდერი და გაყინული ბარკლები რომელიღაც ქვეყნიდან შეისყიდა, ტენდერის პირობები ისეთია, პროდუქტი აუცილებლად უნდა უყოს უცხოეთიდან შემოტანილი.ეს ჩემთვის გაუგებარია. საერთოდ საკანონმდებლო დონეზე უნდა იქნეს ეს საკითხი დარეგულირებული“, - განაცხადა რევაზ ვაშაკიძემ.
ბაჩო ადამია