2022 წლიდან 2027 წლამდე თურქეთში განახლებადი ენერგიის სიმძლავრე 64%-ით გაიზრდება და 90 გიგავატს მიაღწევს, რითაც თურქეთი გახდება განახლებადი ენერგიის მეოთხე უდიდესი ბაზარი ევროპაში და მეათე უდიდესი ბაზარი მსოფლიოში. ამის შესახებ ენერგეტიკის საერთაშორისო სააგენტოს (IEA) ხელმძღვანელმა ფატიჰ ბიროლმა განაცხადა.
თურქეთის გარდა, ათეულში მოხვდებიან ჩინეთი, აშშ, ინდოეთი, გერმანია, ბრაზილია, ესპანეთი, იაპონია, ავსტრალია და დიდი ბრიტანეთი.
„ჩვენ ველით, რომ ამ ზრდის თითქმის 75%-ი მზის და ქარის ენერგიაზე მოდის“, - თქვა ბიროლმა.
თურქეთში ქარის ტურბინები გამოიმუშავებს დაახლოებით 11,3 ათასი მეგავატს წელიწადში და ამ მაჩვენებლით ჩამოუვარდება მხოლოდ ჰიდროენერგიას, რომელიც ყოველწლიურად გამოიმუშავებს 31,6 ათას მეგავატს. ოქტომბრის ბოლოსთვის თურქეთში მზის ენერგიის სიმძლავრემ 9,1 ათას მეგავატს მიაღწია. 2027 წლისთვის თურქეთი მზის დანადგარების სიმძლავრეს 49%-ით გაზრდის, ქარისას კი 24%-ით.
ენერგეტიკული კრიზისისა და წიაღისეული საწვავზე ფასების მატების ფონზე, განახლებად ენერგიას უახლოეს წლებში უჩვეულო ზრდის პერიოდი დაუდგება.
2021 წლის შემოდგომაზე თურქეთმა მოახდინა პარიზის შეთანხმების რატიფიცირება და გამოაცხადა თავისი მიზანი 2053 წლისთვის სათბურის აირების ნულოვანი ემისიის მიღწევის შესახებ.
2022 წლის ივნისში, შრომის საერთაშორისო ორგანიზაციამ განაცხადა, რომ თურქეთს შეუძლია გაზარდოს მშპ 8 მილიარდი დოლარით 2030 წლისთვის და შექმნას 300 000-ზე მეტი ახალი სამუშაო ადგილი, განახლებად ენერგიაში ინვესტიციების გზით.