ტურიზმის სფეროში დასაქმებული ადამიანების დასახმარებლად, გამონაკლისის სახით, მთავრობა წინა წლის ბოლო 6 თვის განმავლობაში არსებული შემოსავლების მიხედვით იხელმძღვანელებს, - ამის შესახებ გიორგი გახარიამ გარემოს დაცვისა და ბუნებრივი რესურსების კომიტეტის თავმჯდომარის, ნინო წილოსანის კითხვაზე პასუხად განაცხადა.

„როდესაც ვსაუბრობთ ამ 1 200-ლარიან დახმარებაზე, ამ დებულებაში გაწერილია, რომ 2020 წლის პირველი სამი თვის განმავლობაში თუ მას ოფიციალური ხელფასი უფიქსირდებოდა, მაშინ იღებს ადამიანი დახმარებას. ამ პერიოდში ამ ადამიანების მუშაობის სეზონი არ იყო და ეს ხელფასიც არ ჰქონდათ.

ფინანსთა სამინისტრო მიიღებს დავალებას, რომ წლის ბოლო 6 თვის განმავლობაში თუ ვინმეს სისტემური ოფიციალური შემოსავალი უფიქსირდებოდა, რა თქმა უნდა, ჩვენ ამ ადამიანების ინტერესებს გავითვალისწინებთ და ამ პირველი კვარტლის პრინციპს ყურადღებას არ მივაქცევთ“, - განაცხადა გიორგი გახარიამ.

იქამდე, ნინო წილოსანმა პრემიერს კითხვით მიმართა: „არ შემიძლია არ გავაჟღერო გიდების, მძღოლების, ტურისტული კომპანიების თხოვნა, რომლითაც ისინი მე დამიკავშირდნენ. საქმე ეხება ერთ შემთხვევაში ტურისტული ორგანიზაციების და კომპანიების მხრიდან ოფიციალურად დასაქმებული ადამიანებისთვის 1 200-ლარიანი დახმარების მიღების შემთხვევებს. ტურიზმის სექტორი მეტ-ნაკლებად სეზონურია და პერიოდული, ამიტომ ა. წ. პირველ კვარტალში, მათ არ ჰქონდათ ფინანსური მოძრაობა და შესაბამისად, საშემოსავლო გადასახადი გადახდილი არ აქვთ თუმცა, წინა წლის საკმაოდ დიდ პერიოდში ისინი საშემოსავლო გადასახადს იხდიდნენ. ტურიზმის სპეციფიკიდან გამომდინარე თხოვნა არის - იქნებ გათვალისწინებული იყოს წინა წლის შემოსავლები“.

მთავრობის მეთაურის ანგარიშს საკანონმდებლო ორგანოში 129 დეპუტატი ესწრება. გიორგი გახარია კანონმდებლებს ახალი კორონავირუსის მასობრივი გავრცელების პრევენციის მიზნით გატარებულ ღონისძიებებთან დაკავშირებულ მოხსენებას აცნობს.

imedinews.ge