ეკონომიკისა და მდგრადი განვითარების მინისტრის ნათია თურნავას ინფორმაციით, საქართველოში უცხოელი ტურისტები გამოჩნდნენ. როგორც მინისტრმა განაცხადა, საქართველოში შემოსული ავიარეისების ¾-ს სწორედ ქვეყნის მოსანახულებლად ჩამოსული ტურისტები შეადგენდნენ.
რამდენად რეალურია არსებული მაჩვენებელი და რა მოლოდინები აქვს კერძო სექტორს ტურიზმის განვითარებასთან მიმართებაში, ამ დეტალების გასარკვევად „კომერსანტი“ ტურიზმის ეროვნული ადმინისტრაციის ყოფილ ხელმძღვანელს მაია სიდამონიძეს დაუკავშირდა.
„ამ რაოდენობით ტურისტების შემოსვლაზე ცოტა ეჭვი მეპარება, რადგან მხოლოდ რამდენიმე მიმართულებით გვაქვს გახსნილი საზღვარი, საიდანაც დიდად ტურისტების რაოდენობა არ ჭარბობდა. შესაბამისად ეჭვი მეპარება 2-3 თვეში ტურისტების ის რაოდენობა დაფიქსირდეს, რომ იმ მიწოდებას ეყოს, რაც დღეს საქართველოში ტურიზმის ინდუსტრიაშია. ვგულისხმობ განთავსების საშუალებებსა და ტურისტულ ობიექტებს.
ზოგადად ერთმანეთის განცხადებებს ეწინააღმდეგებიან. ჯერ ფინანსთა მინისტრმა ახსენა ზღვაში წვეთიაო, ეხლა თურმე ბევრ ტურისტს ველოდებით. თუ იქნებიან ძალიან კარგი, მაგრამ ის რაოდენობა რომ დაფიქსირდეს, რაც ქვეყნისთვის მნიშვნელოვანია საზღვრების გახსნას სხვა ქვეყნებთანაც მოითხოვს“, - აცხადებს მაია სიდამონიძე.
მაია სიდამონიძის ინფორმაციით, უახლოესი ორი წლის განმავლობაში ტურიზმის სექტორი ჩვეულ რიტმს ვერ დაუბრუნდება.
„დღეს მსოფლიოში ფრენები იმ სიხშირით რომ აღდგეს, რაც წინა წლებში იყო, მოგზაურობა იგივე ტენდენციით მაინც არ განახლდება. ჯერჯერობით მაინც არიან ადამიანები, ვინც არ რისკავს, სიფრთხილეს იჩენს და არ მოგზაურობს, ან უბრალოდ ზედმეტი რეგულაციების გამო ისევ თავის ქვეყანაში დასვენებას აირჩევს. არც საქართველოში გვაქვს იმის ილუზია, რომ თუნდაც ფრენების ეტაპობრივ განახლებასთან ერთად ტურისტების რაოდენობაც იგივე ტემპით განახლდება. ეს საკმაოდ ნელი პროცესი იქნება, ამიტომაც უამრავი საფინანსო თუ კვლევითი ორგანიზაცია ტურიზმის განახლებას შემდეგი ორი წლის განმავლობაში წინასწარმეტყველებენ“, - განმარტავს სიდამონიძე.
როგორც ტურიზმის ეროვნული ადმინისტრაციის ყოფილი ხელმძღვანელი აღნიშნავს, საეჭვოა ტურისტების მოსალოდნელი რაოდენობა ტურისტული ბიზნესისთვის მნიშვნელოვანი შეღავათი იყოს. მისი თქმით, ამ სფეროს პროგნოზი მომავალი წლის ივნისამდე ნეგატიურია.
„მსოფლიოში ეპიდსიტუაცია არასტაბილურია, აქედან გამომდინარე სწორი და არასწორი პროგნოზები და პასუხები არ არსებობს, თუმცა იმისათვის, რომ ჩვენ თუნდაც წინა წლების მაჩვენებლებს დავუბრუნდეთ, იმ პირობებში თუ ვირუსი გახდა კონტროლირებადი, კონკრეტულად საქართველოს მინიმუმ ორი წელი სჭირდება. თუ ვირუსი პერიოდულად იქნება ფეთქებადი და საზღვრები ხელახლა ჩაიკეტება ეს ორ წელიწადშიც შეუძლებელი იქნება. იმისათვის, რომ გარკვეულწილად საგრძნობ მაჩვენებელზე ავიდეთ და შევძლოთ სესხების და ხარჯების გადახდა, ჩვენი კერძო სექტორის და ამ სფეროს პროგნოზი მომავალი წლის ივნისამდე ნეგატიურია. ვვარაუდობთ, რომ ფაქტიურად თვითგადარჩენის რეჟიმში ვიქნებით“, - ამბობს მაია სიდამონიძე.
ეკონომიკისა და მდგრადი განვითარების მინისტრის განცხადებით, ამ ეტაპზე სხვა ავიაკომპანიებთანაც მიმდინარეობს მოლაპარაკება და ეპიდემიოლოგიური ვითარების გათვალისწინებით აგვისტოსა და სექტემბერში ახალ რეისებსაც შეიძლება ველოდოთ.
ანი ცარციძე