აპრილის 140%-იანი მატების შემდეგ, მაისში ვიზიტორების რაოდენობა გასული წლის ანალოგიურ პერიოდთან შედარებით 188%-ით 105 000-მდე გაიზარდა. კიდევ უფრო მეტად - 264%-ით 96 500-მდე გაიზარდა ტურისტების რაოდენობა. სამნიშნა ზრის მიუხედავად, მთავრობის მოლოდინი, რომ ტურიზმის 2019 წლის მაჩვენებლის ნახევარს მიაღწევდა ჯერჯერობით არ მართლდება და რეალობა სასურველს 2.2-ჯერ ჩამორჩება. 50%-ის მაგივრად, მაისში ტურიზმი მხოლოდ 23%-ით აღდგა.
ვიზიტორების რაოდენობის მიხედვით პირველი 15 ქვეყნიდან 2020 წელთან შედარებით მინიმუმ ორნიშნა და ზოგ შემთხვევაში ხუთნიშნა პროცენტული ზრდაც ფიქსირდება, თუმცა 2019 წელთან შედარებით დადებითი დინამიკა მხოლოდ უზბეკეთიდან აღინიშნა.
პანდემიამდელ პერიოდში ვიზიტორებში მეზობელი სახელმწიფოების წილი 70%-ს აჭარბებდა, დღეს ეს რიცხვი 46%-მდეა შემცირებული. თურქეთი ისევ პირველ ადგილზეა, მაგრამ მეორე ადგილი უკრაინამ, მესამე კი ისრაელმა დაიკავა, საიდანაც საქართველოს საზღვარი, გასული წლის ანალოგიურ პერიოდთან შედარებით 24 887%-ით მეტმა ადამიანმა გადმოკვეთა. აპრილში ზრდა 13 000% იყო. ისრაელმა საკუთარი მოქალაქეების 60%-ზე მეტი კოვიდზე ორივე დოზით აცრა, რამაც მსგავს ასტრონომიულ ზრდაში გადამწყვეტი როლი ითამაშა.
186%-იანი ზრდის მიუხედავად რუსეთი მეოთხე ადგილს დასჯერდა, რომელიც 2019 წელს მეორე ადგილს იკავებდა, მეხუთე ადგილი სომხეთმა დაიკავა, მეექვსე თავად საქართველომ (არარეზიდენტი პირები) ერთ დროს პირველმა აზერბაიჯანმა კი მეშვიდე ადგილზე გადაინაცვლა.
ევროკავშირის ქვეყნებიდან 887%-იანი ზრდა დაფიქსირდა. როგორც რაოდენობრივად - 837, ასევე პროცენტულად + 10 363% ყველაზე დიდი ზრდა პოლონეთიდან აღინიშნა. თუმცა იგივე პოლონეთიდან მიმდინარე წლის მაისის სტატისტიკა, 2 წლის წინანდელ რიცხვებს 11-ჯერ ჩამორჩება.
ვიზიტორების 50.3%-მა საზღვარი საჰაერო გზით გადმოკვეთა, 49.1%-მა სახმელეთოთი, რომჯელიც 1-ელ ივნისამდე დაკეტილი იყო და ქვეყანაში შემოსვლისთვის მსურველს სპეციალური ნებართვა ესაჭიროებოდა.
მაისში თბილისის აეროპორტმა 36 200 ვიზიტორს უმასპინძლა, ბათუმის აეროპორტმა - 13 500-ს, ხოლო ქუთაისისამ - 3000-ს. ამ სამიდან გასულ წელს უმნიშვნელო დატვირთვით მხოლოდ თბილისის აეროპორტი მუშაობდა, რომელმაც სპეცრეისებით 1313 მგზავრი მიიღო.
ტურიზმის ეროვნულ ადმინისტრაციას მონაცემები დღეების მიხევით არ ჩაუშლია. მაღალი ალბათობით, ვიზიტორების რაოდენობის ზრდა 17 მაისის გადაწყვეტილებამ იქონია, რომლის ძალითაც კომენდანტის საათმა 21:00 სთ-დან 23:00 სთ-მდე გადაიწია, 22 მაისიდან კი რესტორნებს შაბათ-კვირას ღია სივრცეში მუშაობის უფლება მიეცათ.
26 მაისიდან გაიხსნა დაცული ტერიტორიებიც. 1-ლი ივნისიდან სახმელეთო საზღვრები, 5 ივნისიდან რესტორნებმა დახურულ სივრცეში მუშაობის უფლებაც მიიღეს. მაგრამ ძალაში რჩება 2 მკაცრი რეგულაცია: გადაწეული და მაინც შენარჩუნებული კომენდანტის საათი და პირბადის ვალდებულება ყველგან, მათ შორის ღია სივრცეში. ეპიდემიოლოგების განცხადებით ვაქცინაციის დაბალი ტემპი შეზღუდვების მოხსნის საშუალებას არ იძლევა. 8 ივნისის მდგომარეობით სრულად აცრილია 51 518 ადამიანი, მოსახლეობის - 1.4%. ანტივაქსერული განწყობების მიუხედავად, მოთხოვნა მიწოდებას ბევრად აჭარბებს და ქვეყანაში ყველა მსურველითვის სამყოფი ვაქცინა ჯერჯერობით შემოტანილი არ არის.
ხუთთვიან დინამიკაში საერთაშორისო მოგზაურების რაოდენობა 2020 წლის ანალოგიურ პერიოდთან შედარებით 77%-ით, 2019 წლის ანალოგიურ პერიოდთან შედარებით კი 89%-ით 330 000-მდეა შემცირებული, ვიზიტორების რაოდენობა შესაბამისად 73%-ითა და 87%-ით, 317 000-მდე, ხოლო მათში ტურისტების რაოდენობა 2020 წელთან შედარებით 65%-ით, 2019 წელთან შედარებიტ კი 83%-ით 289 000-მდეა შემცირებული.
გიორგი ელიზბარაშვილი