ზამთრის ტურიზმის პერსპექტივა დაახლოებით თვენახევარში გამოიკვეთება, თუმცა პროგნოზი მოსალოდნელ სეზონთან დაკავშირებით ჯერჯერობით უიმედოა. დარგის სპეციალისტები ვარაუდობენ, რომ, დიდი ალბათობით, მომდევნო სეზონიც წარუმატებელი აღმოჩნდება. ასეთ მოსაზრებას ამყარებს დაანონსებული ვირუსის მეხუტე ტალღა, შესაძლო რეგულაციები და სხვა.  

როგორც ტურიზმის სპეციალისტები აღნიშნავენ, პანდემიაა და მთელი ეკონომიკა, მათ შორის, ტურიზმი კოვიდ-19-ის მძევალი რჩება. სექტორში დანაკარგის ანაზღაურება კი, ტურიზმის დარგის სპეციალისტის, პროფესორ ნიკა კვარაცხელიას აზრით, წლებს და საკმაოდ დიდ რესურსს მოითხოვს.

,,ზამთრის ტურიზმთან დაკავშირებით მდგომარეობა დღესდღეობით უფრო მძიმეა, ვიდრე ზაფხულის სეზონისთვისაა დამახასიათებელი.  უცხოელი დამსვენებლების მოზიდვა გარკვეულ პრობლემად რჩება, ამიტომ ძირითადად შიდა ტურისტების იმედად ვრჩებით,  ძალების აღდგენა აქედან უნდა დაიწყოს, მაგრამ  ჩვენთან მაინც და მაინც დიდი პოპულარობით არ გამოირჩევა. რა თქმა უნდა, იგი თავისი შემოსავლით ვერ გაუტოლდება უცხოეთიდან მიღებული ტურისტების დანახარჯებს, მაგრამ პანდემიურ პერიოდში მეტი პერსპექტივა აქვს.  ჩვენი მთავარი პრობლემაა, რომ ტრადიცია არ გვაქვს. სტანდარტი ევროპულს მკვეთრად ჩამორჩება, როცა მიმზიდველობაზე ვსაუბრობთ, ინფრასტრუქტურაც შესაბამის დონეზე უნდა იყოს განვითარებული. ზამთარში რომც  კარგად  ამუშავდეს ტურიზმი, შეიძლება, კურორტებზე ეპიდემიის ცხელი წერტილები გაჩნდეს, როგორც ეს შარშან ბათუმში მოხდა.  რეალურად არაფერი გამოდის. რამდენიმე წელი და საკმაო რესურსია საჭირო, რომ ტურიზმი პანდემიამდელ მაჩვენებელს დაუბრუნდეს“, - უთხრა „ეომერსანტს“ ნიკა კვარაცხელიამ.

მისი თქმით, რეგულაციების გარეშე ტურიზმი ვერ იმუშავებს და სანამ კოვიდ-19-თან დაკავშირებით არსებული სიტუაცია არ გამოსწორდება, სექტორში რისკიც დიდია.

მდგომარეობის გამოსწორების მოლოდინი ჯერჯერობით ნაკლებად აქვს ტურიზმის სფეროს ექსპერტს, პროფესორ მანანა ალადაშვილს. როგორც ის ,,კომერსანტთან“ საუბარში ამბობს, ზამთრის კურორტებზე  ადგილები სექტემბერ-ოქტომბრიდან დიდწილად დაჯავშნული იყო, ამ დროისთვის კი შეკვეთები საერთოდ არ არის, რაც მოლოდინებზეც ნეგატიურად მოქმედებს.

,,ზამთრის ტურისტული სეზონი რეგულაციებით ჩაივლის, რაც ტურისტების დიდ ნაწილს არ მოსწონს. უსაფრთხოების გამო გარე ტურიზმს ძალიან ბევრ ქვეყანაში გაუჭირდება. საქართველოს შემთხვევაში, მნიშვნელოვნად ვართ დამოკიდებული ამინდზეც, რასაც  წინასწარ ვერავინ განსაზღვრავს.  ჯერჯერობით კი სიტუაცია რთულია,  არც ჯავშნები გაუკეთებია ვინმეს, არადა, შეკვეთები სექტემბრიდან უნდა დაწყებულიყო.  შეიძლება,  შარშანდელზე უკეთესი სიტუაცია გვქონდეს, მაგრამ ეს არასაკმარისია. მით უმეტეს, ვირუსის მეხუთე ტალღაც დაანონსებულია.  ალბათ, 2024 წლამდე საქართველოში ზამთრის ტურიზმი ვერ აღდგება.  განსაკუთრებით მსხვილ სასტუმროებს გაუჭირდებათ, რადგან პანდემიისას დამსვენებლები უპირატესობას მაინც  ღია სივრცეებსა და საოჯახო სასტუმროებზე აკეთებენ, რასაც მეტი პრიორიტეტი მიენიჭება“, - ამბობს მანანა ალადაშვილი.

ცნობისთვის, მიმდინარე წლის 8 თვეში საქართველომ ტურიზმიდან შემოსავლების სახით $704 მლნ მიიღო. ეროვნული ბანკის ინფორმაციით, აღნიშნული მაჩვენებელი  30%-ით მეტია 2020–ის წლიურ მაჩვენებელზე. 

ამასთან,  მხოლოდ აგვისტოში ტურიზმიდან მიღებული შემოსავლების ოდენობა $199 მილიონს შეადგენს.

აგვისტოში საქართველოს 267 400 ვიზიტორი ესტუმრა, მათგან 247 200 ტურისტი იყო.

მარი ჩიტაია