გლობალურმა პანდემიამ ყველაზე დიდი გავლენა ტურიზმის სფეროზე იქონია. ამ კუთხით განსაკუთრებულად ავტოგაქირავების კომპანიები დაზარალდნენ, რომლებიც ძირითადად ტურისტულ სეგმენტს ემსახურებოდნენ. არსებულ პრობლემებზე „კომერსანტს“ ავტოგაქირავების საერთაშორისო კომპანია „ჰერცის“ ოპერაციული მენეჯერი დავით ჯანბერიძე ესაუბრა.

„კომპანიის საქმიანობაზე პანდემიამ უარყოფითად იმოქმედა. ჩვენი მომხმარებლების 90% ტურისტები იყვნენ და შეგვიძლია ვთქვათ, რომ ამ კუთხით მუშაობა საერთოდ გაჩერდა. რაც შეეხება მეორე სეგმენტს, რომელსაც კორპორატიული კლიენტები წარმოადგენენ, ამ მხრივაც პროცენტულმა მაჩვენებელმა იკლო, თუმცა არ შეჩერებულა. რომ შევაჯამოთ, მოკლევადიან გაქირავებაში, რომელიც ტურიზმზე არის ორიენტირებული, მომხმარებელთა მაჩვენებელი 98-99%-ით შემცირდა, ხოლო კორპორატიულ სეგმენტში - 40-50%-იანი კლებაა. გარდა ამისა, კომპანიის ხელმეორედ გახსნამდე, კადრების შემცირებისა და მანქანების ნაწილის გაყიდვის საკითხიც დადგა. თუმცა, ამის საჭიროება აღარ ყოფილა და ამ ეტაპზე, თანამშრომლების მცირე ნაწილი უხელფასო შვებულებაში იმყოფება“, -განმარტავს დავით ჯანბერიძე.

დავით ჯანბერიძის ინფორმაციით, ადგილობრივების მხრიდან მსგავსი ტიპის ავტომომსახურებაზე ინტერესი დიდია, თუმცა კომპანიის რთული რეგულაციებიდან გამომდინარე, მათთვის ეს სერვისი ხელმისაწვდომი არ აღმოჩნდა. „ჰერცის“ სამომავლო გეგმების შიდა ტურიზმის განვითარებაზე მიმართვის საბაბი სწორედ ეს პრობლემა გახდა.

„პირველ რიგში, ვგეგმავთ ქართულ სეგმენტზე ორიენტირებას. ვაპირებთ რეგულაციების გამარტივებას, რადგან ადგილობრივებმაც შეძლონ ჩვენი მანქანებით სარგებლობა და სასტუმროებთან ერთად საერთო სტრატეგიის შემუშავება გვსურს“, - აცხადებს Hertz-ის ოპერაციული მენეჯერი.

Hertz-ი ავტოგაქირავების საერთაშორისო კომპანიაა, რომელსაც მსოფლიოს მასშტაბით 147 ქვეყანაში 8 100-ზე მეტი ავტომობილების გასაქირავებელი ლოკაცია აქვს. საქართველოში კომპანია 2000 წლიდან ოპერირებს, რომელმაც ქართულ ბაზარზე გამორჩეული და სანდო რეპუტაცია შეიქმნა.

ანი ცარციძე