“ეროვნულ ბანკს ცუდს და უარესს შორის არჩევანი უნდა გაეკეთებინა, შესაბამისად ეროვნულმა ბანკმა მონეტარული პოლიტიკის გამკაცრების გზა აირჩია, რომელიც სამწუხაროდ არც ეკონომიკის განვითარებას შეუწყობს ხელს და ლარში არსებულ სესხებზე საპროცენტო განაკვეთს გაზრდის “-  ამის შესახებ რადიო კომერსანტის გადაცემაში პროფესიონალები „საზოგადოება და ბანკების“ ხელმძღვანელმა გიორგი კეპულაძემ ისაუბრა. მისივე თქმით რეფინანსირების განაკვეთზე უკვე 125 000 სესხია მიბმული, რაც მომავალში საპროცენტო განაკვეთებსაც შეეხება და რა თქმა უნდა ეს უარყოფითად აისახება მათზე ვისაც სესხი ლარში აქვთ აღებული.

“ვფიქრობ, რომ ეს ყველაფერი ინფლაციაზე და ზოგადად ქვეყანაში არსებულ ეკონომიკურ მდგომარეობაზეა დამოკიდებული, 2021 წლის ბოლომდე, გრძელვადიან პერიოდში რეფინანსირების განაკვეთის მნიშვნელოვან შემცირებას არ ველოდები. ამისთვის საჭიროა, რომ ქვეყანა გაიხსნას, ეკონომიკა ამუშავდეს, ტურისტი შემოვიდეს, ლარი გამყარდეს და ზოგადად ეკონომიკური მდგომარეობა გამოსწორდეს. ამის შემდეგ ეროვნულ ბანკს რეფინანსირების განაკვეთის შემცირების საფუძველი ექნება, რითაც ეკონომიკაში მეტი ფულის გაშვებას და დაბანდებას მისცემს სტიმულს. 

გრძელვადიან პერსპექტივაში ეს ყველაფერი დამოკიდებულია ეკონომიკურ მდგომარეობაზე, ინფლაციაზე, ასევე იმაზე თუ როგორ ჩაივლის ვაქცინაციის პროცესი, რამდენად სწრაფად შევძლებთ ქვეყნის გახსნას.”- აღნიშნა გიორგი კეპულაძემ.

კეპულაძის თქმით, რეფინანსირების განაკვეთის 1%-ით ზრდა საკმაოდ მკაცრი ნაბიჯი იყო, თუმცა ფასების სტაბილურობისთვის სხვა გზა არ არსებობდა. 

“შეიძლება ვიმსჯელოთ იმაზეც, რომ ეროვნულ ბანკს შეეძლო რეფინანსირების  განაკვეთის ნელ-ნელა გაზრდა, თუმცა საბოლოო ჯამში მაინც იგივე შედეგს მივიღებდით, განსხვავება ის იქნებოდა, რომ უბრალოდ ნელ-ნელა შევეგუებოდით ზრდას.” -  აღნიშნა გიორგი კეპულაძემ. 

რაც შეეხება ეროვნული ბანკის ინტერვენციებს, გიორგი კეპულაძის თქმით, ეკონომიკური მდგომარეობის გამოსასწორებლად და ლარის კურსის გასამყარებლად ეროვნულ ბანკს ბევრი ბერკეტი არ გააჩნია, ინტერვენციები კი მოკლევადიანი ეფექტის მომტანია.

“თუ ყველა მაკროეკონომიკური პარამეტრები გაუარესებულია მარტო ინტერვენციებით ლარის კურსს ვერ დავიჭერთ. ზოგადად ვისურვებდი, რომ აქცენტი მთავრობის პასუხისმგებლობაზე და მის მიერ გადადგმულ ნაბიჯებზე გაკეთდეს, რადგან ეკონომიკური სიტუაციის გამოსწორების ან გაუარესების ბერკეტი მთავრობას გაცილებით მეტი აქვს, ვიდრე ეროვნულ ბანკს. ვხედავთ რომ ეს ინტერვენციები მხოლოდ მოკლევადიან ეფექტს ახდენს და გრძელ ვადაში როდესაც ქვეყანას სავალუტო შემოდინების კუთხით მილიარდობით დოლარი დააკლდა, ძალიან რთულია, რომ ჩვენი წილი ლარის კურსში რეზერვები დავიჭიროთ.

პირველ რიგში მგონია რომ ვაქცინაციის სწრაფად წარმართვის და ქვეყანაში ვაქცინის დროულად შემოტანის შანსი ხელიდან გავუშვით, ჩვენ  შეგვეძლო პატარა  ქვეყნის  უპირატესობა გამოგვეყენებინა, ვეხედავთ, რომ  ახალგაზრდებში  აცრის ბევრი მსურველია, თუმცა ახლა  გვაქვს  ერთი  ტიპის  ჩინური  ვაქცინა და ისიც არასაკმარისი რაოდენობის” -  აღნიშნა კეპულაძემ.

კეპულაძის თქმით ეკონომიკის გაჯანსაღების ხაზი ვაქცინაციის პროცესის სწრაფად  წარმართვაზე და რეგულაციების მოხსნაზე გადის.