ანტიკრიზისულ გეგმაში, რომელიც მთავრობამ რამდენიმე დღის წინ წარადგინა, საუბარი არ ყოფილა სამშენებლო სექტორზე.სფერო, რომელმაც  2008 წლის კრიზისის შემდეგ გამართული ფუნქციონირება შეძლო, დღეს კორონავისუსის პრევენციის მიზნით დაწესებული აკრძალვების გამო შეჩერებულია.აღმოჩნდება თუ არა მთავარი წინაღობა სამშენებლო ბაზრისათვის covid-19, მენაშენეებს  ჯერ ამაზე საუბარი უჭირთ.

„კომერსანტი“ დაინტერესდა  რა მდგომარეობაა დღეს სექტორში,არის თუ მთავრობის მიერ წარდგენილი გეგმა მათზე მორგებული და როგორ გაგრძელდება სამშენებლო პროცესები ქვეყნის მასშტაბით.

„მენაშენეთა ასოციაციის“ წარმომადგენლის  თორნიკე აბულაძის განცხადებით,  თუ ვირუსის გამო დაწესებული აკრძალვები ისევ გაგრძელდა, სექტორში  2008 წლის კრიზისული პერიოდი განმეორდება. „მშენებლებთან მიმართებაში არაფერი კონკრეტული არ თქმულა და არც ველოდებოდით, რადგან ჯერ არ ვიცით რამდენად შეგვეხო ვირუსის მიერ გამოწვეული პრობლემები.თუმცა, ერთის თქმა შემიძლია, რომ თუ აკრძალვები დიდხანს გაგრძელდა და ვირუსი დაღმავლობისკენ არ წავიდა, დიდი შანსია სამშენებლო ბაზარზე ისეთი გართულება იყოს, როგორიც 2008 წელს გვქონდა.შეიძლება შეზღუდვები მოიხსნას, მაგრამ მოსახლეობა უძრავ ქონებაში თანხის ჩადებისგან თავს შეიკავებს.ისინი ამჯობინებენ, რომ თანხები შეინახონ და თავდაცვის მიზნით ჰქონდეთ დანაზოგი.“-აცხადებს თორნიკე აბულაძე.

თორნიკე აბულაძის განმარტებით, მსოფლიო  საერთო „ავარიაში“ მოყვა და წინასწარ დაზუსტებული საუბარი, თუ რა პრობლემები დაფიქსირდება კონკრეტულ სექტორში რთულია.

„როგორც ყველა სფერო, დღეს ჩვენც გაჩერებულები ვართ თუმცა, როგორც ასეთი პრობლემები გამოვლენილი არ არის. ჯერ არ ვიცით სად გვაქვს პრობლემა და რა ტიპის დახმარება გვჭირდება, ან შეიძლება საერთოდ არ გვქონდეს პრობლემა და აქეთ შევძლოთ სხვებს დავეხმაროთ, ეს ყველაფერი მაშინ გვეცოდინება, როდესაც მასშტაბურად ავმოქმედდებით.პრემიერის პროგრამაში რომ ყოფილიყო ისეთი,რაც მენაშენეებს შეეხებოდა გამიკვირდებოდა კიდეც, რეალურად ჩვენთან რაიმე ტიპის მწვავე პრობლემა არ დაფიქსირებულა და დიგნოზის დონეზეც არ ვართ, მას შემდეგ რაც პანდემიის გამო დაწესებული აკრძალვები შემსუბუქდება და ჩვეულ რეჟიმში დაიწყებთ მუშაობას, მერე იჩენს თავს თუ რაიმე ტიპის შეფერხება მოგვიწევს ან პრობლემა შეგვექმნება.“-აცხადებს  თორნიკე აბულაძე.

 ნათია ლომიძე