15 აგვისტოს ვაჭრობის შედეგად აშშ დოლარი გამყარდა და 2.7877 ლარი შეადგინა. კურსი, რომელიც დღეს მოქმედებდა, 2.7089 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში -7.88 თეთრი შეადგინა. გამყარდა ევრო, რომლის კურსი 2.8426 ლარია. მაშინ როცა დღეს მოქმედი კურსი 2.7880 ლარს შეადგენდა. შესაბამისად, ევროს ცვლილებამ 5.46 თეთრი შეადგინა.

ფინანსისტი ზვიად ხორგუაშვილი მიიჩნევს, რომ სებ-ის მიერ დადგენილ დღევანდრელ კურსზე რაიმე ანალიზის გაკეთება დღეს შეუძლებელია, რადგანაც ჯერ უნდა გაანალიზეს ის მაჩვენებლები, რაც ამ კურსის დადგენას წინ უძღოდა. შესაბამისი მაჩვენებლები კი ცნობილი 1 თვის შემდეგ გახდება.

„1,2 ან 3 დღეში ლარის კურსს რაც არ უნდა მოუვიდეს შეუძლებელია რაიმე ანალიზის გაკეთება, რადგანაც ჯერ დეტალებში უნდა ინახოს რიცხვები. თუ კი ვინმე რიცხვების გარეშე ანალიზს აკეთებს ის უბრალოდ მკითხაობს. ეს რიცხვები კი დაიდება 1-2 თვეში და ამის მერე შეგვიძლია ანალიზის გაკეთება, თუ რამ გამოიწვია ლარის გაუფასურება, თუ გამყარება.

მოკლევადიან ჭრილში ჩვენ გვინახავს მკვეთრი გაუფასურებაც და მკვეთრი გამყარებაც. ეს ხშირად ლოგიკურად კავშირდება რუსეთიდან შემოსულ ფულთან. ახლა გაუფასურება შესაძლოა დაუკავშიროთ იმას, რომ შესაძლოა რაღაც ტრანზაქცია განხორციელდა.

დღეს თუ ვინმე გეტყვით, ამიტომ გაუფასურდა ან გამყარდაო ლარის კურსი ეს იქნება ტყუილი. როცა ეროვნული ბანკი რაღაც ინტერვენციებს ახორციელებს ამ ინტერვენციებზე დაყრდნობითაც შეუძლებელია რამე პასუხის გაცემა. სებ-ი ფინანსურ სტაბილურობაზე ზრუნავს და მისი ინტერვენციები გამყარების დროსაც გამართლებულია და გაუფასურების დროსაც. ერთ დღეში არც გაუფასურება ვარგა და არც გამყარება, აცხადებს „კომერსანტთან ხორგუაშვილი.

აღსანიშნავია, რომ დღეს თიბისი კაპიტალის მიერ დღეს გამოქვეყნებულ ყოველკვირეულ მიმოხილვაში აღნიშნული იყო, რომ თიბისი კაპიტალის გაცვლითი კურსის პროგნოზირების ჩარჩოს მიხედვით, წმიდა შემოდინებები კვლავ ძლიერი იქნება, ლარის საშუალო კურსის მხრივ შეფასება დიდწილად ნეიტრალურია, ხოლო ინფლაციის კუთხით პროგნოზი ნეგატიურია, „რადგანაც ჩვენი შეფასებით, უკვე აგვისტოში, სეზონური ფაქტორების გათვალისწინებითაც კი, წინა თვესთან მიმართებაში დეფლაცია უნდა დაფიქსირდეს.

ამავდროულად, ასევე გასათვალისწინებელია ლარის კურსის სეზონურობაც. ცალსახაა, რომ ვალუტის წმინდა შემოდინების კუთხით, სეზონურობის არგუმენტები არსებობს, მაგრამ თუ ბაზრის მონაწილეები ამის შესახებ ინფორმირებულები არიან, რაც ჩვენი აზრით
დიდწილად სწორედ ასეა, ლარის სეზონურ მერყეობას სულ მცირე ნაკლებად ექნება ადგილი. მართლაც, არაა გამორიცხული, რომ „პარასკევის ავარდნა“, გარდა ლარის გარკვეულწილად ზედმეტად გამყარების აღქმისა, რასაც სებ-ის ინტერვენციებიც განაპირობებს, მე-4 კვარტალში სეზონური გაუფასურების მოლოდინმაც გამოიწვია. ამდენად, შეიძლება ითქვას, რომ კურსის
სეზონურობა მის მიმდინარე დინამიკაში უკვე რამდენადმე მაინც გათვალისწინებულია. 

თიბისი კაპიტალის მოდელის მიხედვით შეფასებულ საპროგნოზო მაჩვენებლებს რაც შეეხება, წლის ბოლოსათვის აშშ დოლართან
მიმართებაში ნიშნული დაახლოებით 2.80-ს შეადგენს, მათ შორის, იმის გათვალისწინებით, რომ ევრო/დოლარი დაახლოებით 1.05 იქნება და სხვა რეგიონული ვალუტების გაცვლითი კურსები აშშ დოლართან მიმართებაში დაახლოებით სადღეისო ნიშნულებზე
შენარჩუნდება. 2023 წლისათვის, ფსონს ევრო/დოლარის უფრო მაღალ ნიშნულზე დავდებდით, რაც ლარის ევროსთან გარკვეულწილად გაუფასურებას და დოლართან დაახლოებით იმავე დონეზე შენარჩუნებას ან სავარაუდოდ, უფრო მეტი ალბათობით, გამყარებას გულისხმოს“, — განმარტავენ თიბისი კაპიტალში.