„Gtex ჯგუფში შემავალი ბრენდების გაყიდვები საშუალოდ 25-30%-ით არის შემცირებული. ბრენდები, რომელიც უფრო მაღალი კლასის სეგმენტზეა გათვლილი, იქ უფრო მეტი პრობლემაა და შესაბამისად გაყიდვების რაოდენობის უფრო დიდი კლებაა. ეს ლოგიკურიცაა, რადგან პანდემიის პირობებში ყველა მომჭირნედ ცხოვრობს და ცდილობს ნაკლები თანხა დახარჯოს“, - ამის შესახებ „კომერსანტს“ Gtex ჯგუფის ხელმძღვანელმა გიორგი ბასილაძემ განუცხადა.

გიორგი ბასილაძის განმარტებით, სავაჭრო მოლებთან საიჯარო პირობებზე მოლაპარაკების შედეგად ამ ეტაპზე ფილიალების დახურვა ან რომელიმე ბრენდის ბაზრიდან გასვლა არ იგეგმება. თუმცა, მისივე თქმით თუ სიატუაცია გაყიდვების კუთხით არ გამოსწორდა, ფილიალების დახურვა გარდაუვალი გახდება.

„გაყიდვების კლება საკმაოდ დიდია. თუმცა პანდემიის პერიოდში ინტენსიური მოლაპარაკება გვქონდა სავაჭრო მოლებთან და ჯერჯერობით მეტ-ნაკლებად სასურველ საიჯარო პირობებს მივაღწიეთ. აქედან გამომდინარე, ბაზრიდან რომელიმე ბრენდის გასვლა ან ფილიალების დაკეტვა არ იგეგმება. პირობებზე შეთანხმება რომ არ მიგვეღწია, ალბათ ობიექტების დახურვა მოგვიწევდა. იჯარის თემა ერთ-ერთი მნიშვნელოვანი კომპონენტია, ამიტომ ამ საკითხის მოგვარება მთავარია. თუმცა, თუ სიტუაცია არ შეიცვალა და გაყიდვების კლება გაგრძელდა ან სავაჭრო ცენტრებმა დამოკიდებულება შეიცვალეს, მაშინ ფილიალების დაკეტვის აუცილებლობა დადგება. კონკრეტულად რომელიმე ბრენდს შეიძლება არ შეექმნას პრობლემა, მაგრამ სავაჭრო ცენტრებიდან გამომდინარე, რომლის იჯარაც გაყიდვების მაჩვენებლის პროპორციულად მაღალი აღმოჩნდება და იქ მომგებიანობა დაბალი იქნება, ეს დახურვის წინაპირობა გახდება“, - განმარტა გიორგი ბასილაძემ.

აღსანიშნავია, რომ შპს Gtex-ი 2007 წლის 17 დეკემბერს დაარსდა. პირველი ბრენდი, რომელიც კომპანიამ საქართველოში შემოიტანა  collezione იყო. ამჟამად „ჯითექსი“ წარმოდგენილია ბრენდებით: collezione, OVS, Penti, Terranova, English Home, Enza Home.

ნინო თამაზაშვილი