„ფრიდომ  ჰაუზის“ გარდამავალი ქვეყნების შესახებ ანგარიშში კვლავ ქართული სასამართლოს დამოუკიდებლობაზეა საუბარი. საერთაშორისო ორგანიზაციის კვლევას კი ის ქართველი ბიზნესმენები აფასებენ, რომლებსაც სასამართლოსთან შეხება ჰქონდათ და მის დემოკრატიულობას კითხვის ნიშნის ქვეშ აყენებენ. მათი თქმით, სასამართლოს დამოუკიდებლობის ეჭვქვეშ დაყენება ქვეყანაში ინვესტიციების შემოდინებას შეუშლის ხელს, მიმდინარე ბიზნესპროექტებს კი რისკის ქვეშ დააყენებს.

 „თუ სასამართლო არ არის დამოუკიდებელი ეს სახელმწიფოს პრობლემაა“-ასე ეხმაურება „ფრიდომ ჰაუზის“ ყოველწლიურ ანგარიშს, ბიზნესმენი ბაკურ კიღურაძე. მისი განცხადებით,სასამართლო, ხელისუფლების ერთ-ერთი შტოა, უმთავრესი რგოლია ხელისუფლების. რაც შეეხება სასამართლოს დემოკრატიულობას, თუ იგი მოიკოჭლებს, გამოდის, რომ სახელმწიფოს აქვს პრობლემა.

„ასეთი პრობლემის წინაშე კი დღეს ჩვენი ქვეყანა დგას, რაც როგორც ბიზნესს, ასევე სხვა ყველა სფეროს  ხელს შეუშლის.ნებისმიერ საქმეს სჭირდება დაცვა, თუ ეს ქვეყანამ და სასამართლომ ვერ უზრუნველყო, ქვეყნის განვითარებაზე საუბარი ზედმეტია.“-აღნიშნავს  ბაკურ კიღურაძე.

საერთაშორისო ორგანიზაციის კვლევას ეთანხმება ბიზნესმენი ანზორ ქოქოლაძეც და აცხადებს, რომ ქართულ სასამართლოს დემოკრატიის პრობლემა წლებია აქვს.

„ანგარიშში აღნიშნული საკითხი არ გამკვირვებია და არც უცხო არ არის ის,  რომ ქართული  სასამართლო დაბალი ნდობით სარგებლობს. რაც არ უნდა  გამჭვირვალე და კარგი წესები გვქონდეს ქვეყანაში, რაც არ უნდა მიმზიდველი გარემო შექმნა, თუ სასამართლოს  ნდობა არ იქნება, აფერმკრთალებს ყველა სწორ ნაბიჯს. სასამართლო არის როგორც საზოგადოებრივი ცხოვრების სხვა მიმართულებებში, ასევე ბიზნესისთვის  ქვაკუთხედი თუ რამდენად იქნება ის ობიექტური. სამწუხაროდ ქვეყანაში ეს ნიშნული და სასამართლოს ობიექტურობა არის დაბალი. არაობიექტური სასამართლო საინვესტიციო კლიმატზე  ნეგატიურ გავლენას მოახდენს.უცხოელი თუ ადგილობრივი  ინვესტორისთვის თანაბრად  მნიშვნელოვანია, რომ  ქვეყანაში სამართლიანობის მაჩვენებელი იყოს მაღალი.“-განაცხადა ანზორ ქოქოლაძე.

 „თუ ქვეყანაში სასამართლოს დამოუკიდებლობა გარკვეულ ზღვარს ქვემოთაა, პირდაპირ აისახება  ბიზნესზე.“-ამის შესახებ კომერსანტს“ ბიზნესმენმა ბეჟან წაქაძემ განუცხადა და აღნიშნა, რომ თუ სასამართლო დემოკრატიული არ იქნება,  ქვეყანაში როგორც ადგილობრივი, ასევე უცხოელი ინვესტიციების წილი შემცირდება.

„საინტერესოა, რომელ პერიოდს შეადარეს სასამართლოს დამოუკიდებლობა, ყველასთვის ინდივიდუალურია, პირადად მე წინა ხელისუფლების დროს 5 მლნ. წამართვეს ისე, რომ არც ვიცი რისთვის გავიღე ეს თანხა. იდეალურად ახლაც არაფერია ამ ქვეყანაში, თუმცა, უნდა შეადარონ კონკრეტულ პერიოდს.“-აცხადებს ბეჟან წაქაძე.  

 შეგახსენებთ, რომ  საერთაშორისო ორგანიზაციის „ფრიდომ ჰაუზის“ ყოველწლიურ ანგარიშში, რომელიც ე.წ. „გარდამავალ ქვეყნებში“ დემოკრატიული მმართველობის სხვადასხვა ასპექტს აკვირდება და აფასებს 2020 წლის კვლევა წარადგინა.  ანგარიში 1995 წლიდან ყოველ წელს ქვეყნდება და ამჟამად ის ევროპისა და ევრაზიის 29 ქვეყანაში არსებულ მდგომარეობას აფასებს.

დემოკრატიების რაოდენობა ანგარიშის 25-წლიანი ისტორიის მანძილზე ყველაზე ნაკლებია: 29 შეფასებული ქვეყნიდან, 10 დემოკრატიულადაა მიჩნეული, 10-ში ჰიბრიდული რეჟიმია, 9-ში კი - ავტორიტარული რეჟიმი. საქართველო გარდამავალი ქვეყნებისა თუ ჰიბრიდული რეჟიმების კატეგორიაშია.

ნათია ლომიძე