საქართველოს ეკონომიკის მოცულობა წინა წლის აპრილთან შედარებით რეკორდულად 44.8%-ით გაიზარდა. ასეთი მაღალი ეკონომიკური ზრდა ძირითადად ე.წ. საბაზო ეფექტით არის განპირობებული, რადგანაც 2020 წლის აპრილში ქვეყანაში მოქმედი ლოქდაუნის გამო ეკონომიკა 16.6%-ით შემცირდა. საქსტატის მონაცემებით, 2021 წლის პირველი 4 თვის ეკონომიკური ზრდა 8.1% იყო.
საქსტატში აღნიშნავენ, რომ აპრილში დღგ-ის გადამხელ საწარმოთა ბრუნვამ 8.44 მილიარდი ლარი შეადგინა, ეს მაჩვენებელი 2020 წლის ანალოგიური პერიოდის მაჩვენებელს 93%-ით აღემატება, რაც ასევე საბაზო ეფექტით არის განპირობებული. ეკონომიკურ ზრდაზე ასევე დადებითი გავლენა მოახდინა ექსპორტმა, რომელიც წელს 19.6%-ით არის გაზრდილი.
საქსტატის ხელმძღვანელი გოგიტა თოდრაძე აღნიშნავს, რომ წინა წლის შესაბამის პერიოდში იყო ეკონომიკის ვარდნა 16.6%-ით. გარდა ამისა, წინა წლის შესაბამის პერიოდთან შედარებით ზრდის ტენდენცია იყო ყველა კუთხით, ასევე ექსპორტის და იმპორტის კუთხითაც, რამაც დადებითი წვლილი შეიტანა შედეგებში.
მისივე თქმით, 51%-ით გაიზარდა საფინანსო და სადაზღვევო სექტორის გამოშვება. ვაჭრობა გააქტიურდა, მასზე დიდი გავლენა მოახდინა ავტომობილებით ვაჭრობამ და ავტოიმპორტი წინა წელთან შედარებით 86%-ით გაიზარდა, რეექსპორტი კი გაზრდილია ექვსჯერ.
2021 წლის აპრილში, წინა წლის შესაბამის პერიოდთან შედარებით ზრდა შეინიშნებოდა შემდეგ დარგებში: დამამუშავებელი მრეწველობა, მშენებლობა, ვაჭრობა, ტრანსპორტი და დასაწყობება, სასტუმროები და რესტორნები, საფინანსო და სადაზღვევო საქმიანობა, უძრავ ქონებასთან დაკავშირებული საქმიანობა, პროფესიული, სამეცნიერო და ტექნიკური საქმიანობა. კლების ტენდენცია დაფიქსირდა სამთომოპოვებითი მრეწველობის დარგში,- ნათქვამია საქსტატის დოკუმენტში.
კავკასიის უნივერსიტეტის ეკონომიკის სკოლის დეკანმა სოსო ბერიკაშვილმა „კომერსანტთან“ აღნიშნა, რომ მიუხედავად იმისა, რომ ეკონომიკის ორნიშნა მაჩვენებლით ზრდის მოლოდინი არსებობდა, ასეთ რეკორდულ ზრდას არავინ ელოდა. მისი თქმით, დეტალებზე საუბარი მხოლოდ მას შემდეგ იქნება შესაძლებელი, როცა ჩაშლილად გამოქვეყნდება ყველა მაჩვენებელი.
„ყველანი ველოდით საქართველოს ეკონომიკის ორნიშნა ზრდას, თუმცა ასეთ დიდს ნამდვილად არავინ ელოდა. არა მარტო 2020 წელთან შედარებით, არამედ 2019 წელთან შედარებითაც საკმაოდ მაღალი ზრდაა (დაახლოებით 21%-მდე). თუმცა აქვე აღნიშნავენ, რომ დღგ-ის გადამხელ საწარმოთა ბრუნვა 2020 წლის ანალოგიური პერიოდის მაჩვენებელს 93%-ით აღემატება, ასევე ექსპორტის ზრდაზე ისაუბრა საქსტატის ხელმძღვანელმა, მშენებლობის ზრდაზეც და ა.შ. თუმცა მეტი დეტალი ცნობილი არ არის, ამიტომ დეტალური მაჩვენებლების გამოქვეყნების შემდეგ უფრო მარტივი იქნება ამის ახსნა და თქმა თუ რასთან გვაქვს საქმე. ეს წინასწარი შეფასებაა და შეიძლება ეს რიცხვები დაკორექტირდეს კიდეც, თუმცა დიდად ალბათ არ შეიცვლება.
ფაქტია ერთია, რომ საქართველოს ეკონომიკის ზრდის მაჩვენებელი შთამბეჭდავია, ამას არავინ ელოდა, ამიტომ თუ ეს მაჩვენებელი რეალურია აუცილებლას უნდა აისახოს მოსახლეობაზე. დამატებითი მონაცემები გვჭირდება რომ შევაფასოთ კონკრეტულად რა მოხდა და რამ გამოიწვია სარეკორდო ზრდა“,- ამბობს სოსო ბერიკაშვილი.