„საპარტნიორო ფონდთან დაკავშირებით საკითხი დგას ისე, რომ წამგებიანია და ბიუჯეტმა უნდა დააფინანსოს, რაც ასე არ არის, ბიუჯეტი არაფერს არ აძლევს, უნდა მოხდეს რეორგანიზება და სამართლებრივად სწორი ფორმა მიიღოს. დღეს არის არამოქნილი, რადგან სამეთვალყურეო საბჭოში მინისტრები არიან და გადაწყვეტილებებს ვერ იღებენ, ამიტომ გაუგებარი სიტუაციაა. ეს თუ არ გამოჯანსაღდა, ფონდი ვერც პროექტებს ვერ გააჯანსაღებს. ასე ხელაღებით იმის თქმა, როგორც სჩვევიათ ხოლმე, რომ უნდა გავაუქმოთ და არ არის საჭირო ორგანიზაცია, მე თემის არცოდნას ვაბრალებ. ეს არის საჭირო ორგანიზაცია, რომელსაც სწორი ფორმირება სჭირდება“, - ასე აფასებს ბიზნესმენი, კომპანია „ისთ გეით ჯგუფის“ სამეთვალყურეო საბჭოს თავმჯდომარე ირაკლი იაშვილი, რეფორმირებული „საპარტნიორო ფონდის“ დაფინანსების ერთ-ერთ შესაძლო წყაროდ სახელმწიფო ბიუჯეტის განხილვას.
„პირველი რიგში მნიშვნელოვანია, რომ ინფორმაცია საპარტნიორო ფონდის დაფინანსების შესახებ არასწორად გავრცელდა, მეორე - ფონდი მინიმუმ 5 წელია რეორგანიზაციას ითხოვს. დღევანდელი ფორმით საპარტნიორო ფონდი არის ფუნდამენტალურად არასწორად ჩამოყალიბებული, როდესაც რკინიგზასთან და სხვა სახელმწიფო კომპანიებთან საერთო ბალანსი აქვს და იმათი ზარალები საპარტნიორო ფონდის ზარალად აისახება. შესაბამისად გავრცელებულია, რომ საპარტნიორო ფონდი წამგებიანია, თუმცა რეალურად რა პროექტიც მან განახორციელა ყველა მომგებიანია. თუ გამორიცხავს რკინიგზის და ელექტროსისტემის ზარალს, დარჩება სუფთა, წმინდა საპარტნიორო ფონდის ფინანსური მაჩვენებელი, რომელიც ძალიან პოზიტიურია. გარდა ამისა, სწორი ფორმა იქნებოდა, რაც თავის დროზე KFW-მ სახელმწიფოს ურჩია, რომ ფონდის რეორგანიზაცია მომხდარიყო და ყოფილიყო განვითარების ბანკი, როგორიც სხვა ბევრ ევროპულ ქვეყანაშია. საპარტნიორო ფონდი არ შედის ისეთ პროექტებში სადაც კერძო ინვესტიცია ჭარბია და უფრო სოციალური დანიშნულების დარგებს ეხმარება, ამიტომ ამ ორგანიზაციის არსებობს აუცილებელია. სახელმწიფოს რაღაც ფორმით მაინც უწევს ეკონომიკაში ჩარევა და ეს ამის ერთადერთი ინსტრუმენტი უნდა იყოს. ასევე სასწრაფოდ გასაუქმებელია ყველა ის ფონდები და სსიპ-ები, რომლებიც უამრავ სამინისტროებთან არსებობს, ყველა ამ პროგრამამ თავი უნდა მოიყაროს მხოლოდ განვითარების ბანკში ანუ სახეშეცვლილ, რესტრუქტუირებულ საპარტნიორო ფონდში. საპარტნიორო ფონდი წლებია ამას ითხოვს, მაგრამ არცერთი მთავრობა ამას არ აკეთებს“, - განმარტავს ირაკლი იაშვილი.
შეგახსენებთ, რომ „Forbes კვირასთან“ ინტერვიუში საპარტნიორო ფონდის აღმასრულებელი დირექტორის მოადგილემ გიორგი დანელიამ განაცხადა, რომ ფონდში რეფორმირების პროცესი აქტიურად მიმდინარეობს. მისი თქმით, რეფორმირების პროცესში ერთ-ერთი ყველაზე მნიშვნელოვანი საკითხი ფონდის დაფინანსების წყაროა. დანელიას თქმით, ფონდის დაფინანსების შესაძლო ერთ-ერთ წყაროდ სახელმწიფო ბიუჯეტი განიხილება.
აღსანიშნავია, რომ უკვე მეორე წელია „საპარტნიორო ფონდი“ რეფორმირების ეტაპზე იმყოფება, იგეგმება გარკვეული სტრუქტურული ცვლილებები, მათ შორის, ფონდის დაფინანსების სტრუქტურასთან დაკავშირებით და ასევე, მიმდინარეობს მსჯელობა ფონდის საკუთრებაში არსებული ზოგიერთი სახელმწიფო კომპანიის ფონდის კაპიტალიდან გასვლის შესახებ.
ნინო თამაზაშვილი