„არმგონია, რომ ის აქ იყოს, ეს ამომრჩევლის მობილიზებისთვისაა გაკეთებული. თუ სააკაშვილის სცენარი განვითარდება, საქართველოს ეკონომიკა დიდი ხნით წინ ვერ წავა, ყველა ჩაიქნევს ჩვენზე ხელს. ეს ნაბიჯი არ იქნება წინ ცივილიზაცისკენ, ეს იქნება უკან ჯოჯოხეთისკენ“, - ამის შესახებ „კომერსანტს“ „ისთ გეით ჯგუფის“ სამეთვალყურეო საბჭოს თავმჯდომარე ირაკლი იაშვილმა, საქართველოს მესამე პრეზიდენტის მიხეილ სააკაშვილის ბათუმში ჩამოსვლის ფაქტის შეფასებისას განუცხადა.

ბიზნესმენი ამბობს, რომ მიხეილ სააკაშვილის საქართველოში ჩამოვლას საერთაშორისო პარტნიორებიც არ ეთანხმებიან.

„გასაგებია სააკაშვილს რაც ამოძრავებს, ამიტომ თუ სცენარი განვითარდა ისე როგორც თვითონ ამბობს და მართლა საქართველოშია, შეეცდება რომ როგორმე ფედერალურ არჩევნებს მიაღწიოს. მთავრობის თქმის მიუხედავად, რომ არჩევნები 2024 წლამდე არ იქნება, სააკაშვილი ამბობს, რომ გაზაფხულზე ჩატარდება, გამოდის რომ ამის მისაღწევად უნდა იძალადოს. ასეთი ძალადობებით ვბრუნდებით 30 წლის უკან და ეს კარგია თუ ცუდი? ძალადობით უნდა, რომ მოიყვანოს თავი ხელისუფლებაში და ეს სახელმწიფოსთვის უკან გადადგმული ნაბიჯია. საერთაშორისო პარტნიორებიც კი ამბობენ, რომ ახლა და ზოგადად სააკაშვილის ჩამოსვლის დრო არ არის“, - ამბობს ირაკლი იაშვილი.

მიხეილ სააკაშვილმა რამდენიმე საათის წინ, საქართველოში ჩამოსვლის შესახებ სოციალურ ქსელში გამოაქვეყნა ინფორმაცია, სადაც წერს: “დილა მშვიდობისა საქართველო. უკვე საქართველოდან 8 წლის შემდეგ“.

ინფორმაციის შემდეგ ის ბათუმიდან ვიდეომიმართვას ავრცელებს, რომელშიც მოსახლეობას არჩევნებზე მისვლისა და ნაცმოძრაობისთვის ხმის მიცემისკენ მოუწოდებს. ექს–პრეზიდენტი ამბობს, რომ სულ მალე ბათუმიდან თბილისში ჩავა.

ნინო თამაზაშვილი