„ბინაზე ფასის ზრდა შეიძლება დაფიქსირდეს, მაგრამ თუ შემოსავალი არ იქნება და შემოსავლისუნარიანობა არ ამაღლდება მოსახლეობაში, ვინ იყიდის ამ გაძვირებულ ბინას?  ბევრი ვიცი, რომელსაც უნდა ბინის შეძენა, მაგრამ ფინანსრურად ვერ სწვდება. უნდა გაიზარდოს მოსახლეობის რაოდენობა ვინც შეძლებს ამ ბინების ყიდვას, წინააღმდეგ შემთხვევაში ჩამაოვა ისევ იმ ფასის ნიშნულზე, რაც აქამდე იყო,“ - "კომერსანტი"  უძრავი ქონების სააგენტოს kibe.ge- ს  დირექტორს ნელი გოგუაძეს უძრავი ქონების გაყიდვებსა და მოთხოვნაზე ესაუბრა, რომელმაც აღნიშნა, რომ გასაყიდი ბინების რაოდენობა ბაზარზე ჭარბადაა, თუმცა მოთხოვნა ამ ეტაპზე ფასებისა და დაბალშემოსავლიანობის გამო, შემცირებულია.

„ვერ ვიტყვით, რომ ბოლო პერიოდში იმდენად გაიზარდა გაყიდვები,  რომ აღსანიშნავი იყოს. თუ არის მოთხოვნა, არის ისევ პატარა ბინებზე და მყიდველიც ძალიან ფრთხილად არჩევს ქონებას და ცდილობს დაბალ ფასში იყიდოს რამე. გვაძლევენ დაკვეთას, რომ თუ ვინმეს ძალიან ეჩქარება და გაყიდის დაბალ ფასად, სწორედ ასეთი ბინები შევურჩიოთ,, ანუ საბაზროზე დაბალ ფასად ეძებენ სახლებს.  გასაყიდი ბინები ძალიან ბევრია, ანუ მიწოდება ბევრია, ვიდრე მოთხოვნა არსებობს. ვიღაც კი შეიძლება ჩქარობდეს, მაგრამ იაფად გაყიდვასაც არ გეგმავენ. 

 ბინებზე ფასები დიდად არ შეცვლილა - ამჟამად საბურთალოლზე 800 დოლარიდან იწყება ერთი კვადრატული მეტრის ფასი ახალ ბინაში, ხოლო ძველ ბინაში 700 დოლარამდეა.

ოდნავ მომატა მოთხოვნამ მიწებზე, სადაც პატარა სახლებს აიშენებენ ან სასსოფლო სამეურნეო დანიშნულებით გამოიყენებენ,“ - ამბობს ნელი გოგუაძე

2020 წლის აპრილ-ივნისში უძრავი ქონების გასაყიდი ფასების ინდექსი 6.7%-ით შემცირდა, თუმცა დარჩენილი წლის ბოლომდე შეინარჩუნა ზრდის ტენდენცია.

ამის შესახებ „აისეტის“ მიერ გამოქვეყნებულ ანგარიშშია აღნიშნული.

მათივე ცნობით, 2020 წელს, წინა წელთან შედარებით, 29.4%-ით შემცირდა უძრავი ქონების გაყიდვების რიცხვი საქართველოში. ამასთან, წლის განმავლობაში კლებადი ტრენდით გამოირჩეოდა გასაქირავებელი ფასების ინდექსიც.

კვლევაში ასევე მოცემულია, თუ როგორი იყო უძრავი ქონების საშუალო გასაყიდი ფასი უბნების მიხედვით, 2020 წელს. როგორც კვლევიდან ირკვევა, თბილისში გასაყიდი საშუალო ფასი ზოგადად - 2 896 ლარი იყო. აქედან, ყველაზე ძვირი - 4 323 ლარი იყო, მთაწმინდა/სოლოლაკში; ხოლო ყველაზე იაფი - 998 ლარი ლილოში.