„თუ კანონპროექტში ცვლილება არ შევა, ჯანდაცვის სამინისტრო გაიზიარებს იმ ტენდენციას, რაც მარეგულირებლებს აქვს, რომ მაქსიმალურად გააკონტროლოს ბიზნესი“, - ამის შესახებ დამოუკიდებელმა დეპუტატმა ლევან კობერიძემ სესიის პლენარული სხდომაზე განაცხადა. მისი თქმით, მარეგულირებელს რეალურად ეძლევა საშუალება, რომ თავისი შეხედულების მიხედვით, ცუდი განზრახვების პირობებში კლინიკის საქმიანობა შეაჩეროს. დამოუკიდებელი დეპუტატმა კითხვები ჯანდაცვის მინისტრის მოადგილეს, თამარ გაბუნიას დაუსვა.
„გთავაზობთ, რომ აქვე განვიხილოთ ჩარჩო სანებართვო პირობების დაბრუნების, დაიყოს ტექნიკური რეგლამენტით ჯგუფებად კლინიკები და ა.შ. თუ ეს არ იქნება შეტანილი კანონპროექტებში, ალბათ ჩაჯდებით იმ ბოლო პერიოდში მიმდინარე ტენდენციაში, რომლითაც რეგულატორებს უნდათ, რომ ბიზნესები მაქსიმალურად აკონტროლონ“, - მიმართა ლევან კობერიძემ გაბუნიას.
კობერიძემ ასევე აღნიშნა, რომ პაციენტის ჯანმრთელობა და სიცოცხლე არის მთლიანი სისტემის ზრუნვის საგანი და რეალურად სამინისტრომ არ უნდა დაკარგოს თავის რეალური ფუნქცია და არ გადაიქცეს სადამსჯელო რაზმად კლინიკების წინაღმდეგ.
„ვინც დასახურია თქვენ ჩემზე კარგად იცით, სამინისტროშიც იციან და ის კლინიკები წესით აქამდეც დახურული უნდა ყოფილიყო და საკანონმდებლო ბაზაც აბსოლუტური სრულყოფილი გაგაჩნიათ, აგერ თქვენ თვითონ ბრძანეთ რომ შეგიძლიათ ყოველგვარი პრობლემის გარეშე ლიცენზიის ჩამორთმევა და სანებართვო პირობების გაუქმებაც, ნუ წავიყვანთ სხვა მიმართულებით აქცენტებს, აქ არის ძალიან მნიშვნელოვანი, ერთი ის რომ სასამართლო როგორც არბიტრი და ის ინსტიტუცია, რომელიც ასეთი ნებისმიერი სახის დავის დროს არის მნიშნელოვანი, ჩვენ ხომ არ ვამბობთ რომ ის არ იყოს და საერთოდ არ მონაწილეობდეს, მონაწილეობდეს შესვლა შეგეძლოთ ოღონდ მოულოდნელობის ეფექტის გათვალისწინებით, მაგრამ შემდეგ უკვე პროცესებმა უნდა გადაინაცვლოს სასამართლოში, იმიტომ რომ შეჩერება პრაქტიკულად გაუქმების ტოლფასია“ , - განაცხადა ლევან კობერიძემ.
შეგახსენებთ, რომ პარლამენტში დარჩქარებული წესით განიხილავენ ჯანდაცვის სამინისტროს მიერ წარდგენილ ცვლილებებს რამდენიმე კანონში: „ჯანმრთელობის დაცვის შესახებ“ საქართველოს კანონში ცვლილების შეტანის თაობაზე“, „ლიცენზიებისა და ნებართვების შესახებ“ საქართველოს კანონში ცვლილების შეტანის თაობაზე“, „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ და „სამეწარმეო საქმიანობის კონტროლის შესახებ“ საქართველოს კანონში ცვლილების შეტანის თაობაზე“.
ცვლილებების თანახმად, ჯანდაცვის სამინისტრო ქვეყანაში მოქმედი კლინიკებისთვის სანქციების გამკაცრებას გეგმავს, ამას უწყების მიერ მომზადებული კანონპროექტი ითვალისწინებს.
„რეალურად, მარეგულირებელს ეძლევა საშუალება თავისი შეხედულებისამებრ, ცუდი განზრახვების პირობებში შეაჩეროს კლინიკის საქმიანობა, პლიუს, ტექნიკური რეგლამენტიდან გამომდინარე, შეჩერების შემდგომ დაბრუნების მექანიზმი თურმე მერე უნდა მოიფიქროს მთავრობამ. გთავაზობთ, რომ აქვე განვიხილოთ ჩარჩო სანებართვო პირობების დაბრუნების, დაიყოს ტექნიკური რეგლამენტით ჯგუფებად კლინიკები და ა.შ. თუ ეს არ იქნება შეტანილი კანონპროექტებში, ალბათ ჩაჯდებით იმ ბოლო პერიოდში მიმდინარე ტენდენციაში, რომლითაც რეგულატორებს უნდათ, რომ ბიზნესები მაქსიმალურად აკონტროლონ“, - მიმართა ლევან კობერიძემ თამარ გაბუნიას.
მინისტრის მოადგილის თქმით, დღევანდელი მოქმედი კანონმდებლობით, მარეგულირებელს, ანუ ლიცენზიის და ნებართვის გამცემ ორგანოს აქვს უფლებამოსილება მიიღოს დამოუკიდებელი გადაწყვეტილება ლიცენზიის და ნებართვის გაუქმების თაობაზე.
კომერსანტი