„თუ ბიძინა ივანიშვილი ისე წავიდა, როგორც ეს 2016 წელს გააკეთა, ჩათვალეთ რომ ერთ ადგილს ვტკეპნით, სადაც ის ქვეყანაში მიმდინარე პროცესებს კვლავ გააკონტროლებს. მაგრამ თუ ის მართლა წავიდა პოლიტიკიდან, როგორც თვითონ ამბობს - კარგი შანსია საქართველომ წინ რამდენიმე ნაბიჯი გადადგას,“ –  საერთაშორისო სავაჭრო პალატის თავმჯდომარე ფადი ასლი „ქართული ოცნების“  თავმჯდომარის ბიძინა ივანიშვილის პოლიტიკიდან წასვლას აფასებს.

კითხვაზე, თუ როგორ შეიძლება შეიცვალოს საინვესტიციო გარემო ქვეყანაში და რა ცვლილებებს უნდა ელოდოს ბიზნესი ივანიშვილის წასვლის შემდეგ, ფადი ასლი პასუხობს, რომ დღეს ხელისუფლებაში არიან ადამიანები, რომელთაც ბიძინა ივანიშვილის მიმართ შიშისგან გათავისუფლების შემდეგ ქვეყანაში ჯანსაღი გარემოს შექმნა მართლაც შეუძლიათ, მისი აზრით, ასეთია პრემიერ-მინისტრიც.

„აქამდე მთავრობას ეშინოდა გადაწყვეტილებების მიღების, მისი ნებართვის გარეშე, ახლა  თუ ბიძინა ივანიშვილი თამაშიდან გავა, მათ ხელფეხი შეიძლება გაეხსნათ და ქვეყანა წინ წასწიონ. მე ვფიქრობ, ეს საქართველოსთვის პოზიტიური სიახლეა. მე ვფიქრობ, რომ ბევრს ეშინოდა მთავრობაში, ფიქრისაც კი -პრემიერმინისტრი ჭკვიანი პოლიტიკოსია, ცდილობს გააკეთოს სწორი საქმე ქვეყნისთვის, მაგრამ საქმე წინ არ მიდის. ეს უნიკალური შანსია - იმედია მთავრობა შეიცვლის დამოკიდებულებას უცხოელი ინვესტორებისა და ინვესტიციების მიმართ, იქნებიან უფრო ლოიალურები და მიმღებლები, აღარ იქნება მათი შეურაცხყოფისა და რეკეტირების შემხვევები. მაგრამ ვნახოთ, ყველაფერი დამოკიდებულია იმაზე თუ რამდენად არის ივანიშვილის წასვლა მორიგი ბლეფი. შედეგს წლის მანძილზე დავინახავთ - მაგრამ ბევრია შესაცვლელი, მთავრობა კორუფციას უნდა ებრძოლოს , სადაც თავადაც ბევრია კორუმპირებული, არ ვიცი როგორ უნდა დასაჯონ საკუთარი თავი.ყოველ შემთხვევაში იმედი მაქვს ინვესტიციების მიმართ ღიაობას შევიძენთ,“ - განმარტავს ბიზნესმენი.

შეგახსენებთ,  11 იანვარს,  ქართული ოცნება - დემოკრატიული საქართველოს“ თავმჯდომარემ, ბიძინა ივანიშვილმა ღია წერილი გაავრცელა, სადაც ნათქვამია, რომ ის მიდის პოლიტიკიდან.

მარიამ მორგოშია