საქართველოს მთავრობა 2020 წლის რთველის სუბსიდირებაზე 60 მილიონი ლარის დახარჯვას გეგმავს. როგორც ღვინის ეროვნული სააგენტოს თავმჯდომარემ, ლევან მეხუზლამ „კომერსანტს“ განუცხადა, სუბსიდიის სტრუქტურა დამუშავების პროცესშია. მისი თქმით, სუბსიდია მხოლოდ რქაწითელის და კახური მწვანის ჯიშის ყურძენზე გავრცელდება.
„სამწუხაროდ 2 უსუბსიდირო წლის შემდეგ, მსოფლიოში შექმნილი კრიზისული სიტუაციიდან გამომდინარე, რაც ობიექტური რეალობაა, საჭიროდ ჩავთვალეთ 2020 წლის რთველში სუბსიდიის სახით ჩავერიოთ, რაც გულისხმობს შემდეგს: როდესაც რომელიმე ღვინის კომპანია ან მარანი, გარკვეული რაოდენობა რქაწითელს და კახურ მწვანეს შეიძენს ფასის ნაწილი დაუსუბსიდირდება“, - განაცხადა ლევან მეხუზლამ.
კომპანია „ისთ გეით ჯგუფის“ სამეთვალყურეო საბჭოს თავმჯდომარე და ღვინის მწარმოებელი კომპანია „ვაზიანის“ ხელმძღვანელი ირაკლი იაშვილი „კომერსანტთან“ საუბრისას აღნიშნავს, რომ თუ ღვინის ხარისხის პრობლემა მოგვარდება და ის მხოლოდ ყურძნისგან გაკეთდება, რთველის სუბსიდირება საჭირო აღარ გახდება.
„ღვინის ინდუსტრიაში ყველაზე მეტად პრობლემა ისაა, რომ იქმნება ხარისხის პრობლემები, რომელსაც სახელმწიფო ყურადღებას არ აქცევს. რთველის სუბსიდირებას აპირებენ და ხარისხს რომ მიექცეს სერიოზული ყურადღება, მაშინ სუბსიდირება შესაძლოა საერთოდ აღარ გახდეს საჭირო, რადგან ყურძენზე მოთხოვნა გაიზრდება. როდესაც ღვინო ყურძნისგან გაკეთდება, რთველის სუბსიდირება საჭირო აღარ იქნება. ეს ჩემი მყარი, ჩამოყალიბებული პოზიციაა, ემპირიულ გამოცდილებაზე დამყარებული“, - განმარტა ირაკლი იაშვილმა.
ბიზნესმენმა პანდემიის პირობებში არსებულ პრობლემებზეც ისაუბრა და აღნიშნა, რომ თუ უახლოეს თვეებში სიტუაცია არ გაუმჯობესდა, ღვინის სექტორი ძალიან მძიმე ვითარებაში აღმოჩნდება.
„წლის ბოლომდე მძიმე წელი იქნება, უკვე ეტყობა რომ პანდემიამ ივნისში კბილების გამოჩენა დაიწყო, რაც მოსალოდნელიც იყო. 3-4 თვეში, შემოდგომისთვის სიტუაცია თუ არ გაუმჯობესდა, შემდეგ უკვე კიდევ უფრო მძიმე ვითარება იქნება. გაყიდვები შემცირებულია ყველა მიმართულებით, მათ შორის რა თქმა უნდა ექსპორტის კუთხითაც. რაც შეეხება ონლაინ გაყიდვებს, ღვინის სექტორში პანდემიამდეც ვითარდებოდა ელექტრონული კომერცია, ის კომპანიები რომლებიც პროდუქციას აწარმოებდნენ, გაყიდვის ელექტრონულ ფორმას ვერ აცდებიან, ჩვენც ამას მეტ-ნაკლებად ვიყენებთ და ვანვითარებთ“, - განაცხადა ირაკლი იაშვილმა.
ნინო თამაზაშვილი