საქართველოში ფულის საბაზრო ღირებულების დადგენა უკვე წლებია ბლუმბერგის სავაჭრო პლატფორმაზე ხდება. ეროვნული ბანკი თვლის, რომ ამ პლატფორმაში გადატანით პროცესი უფრო პროგრესული და გამჭვირვალე გახდა, რადგან სწორედ ეს არის საუკეთესო საერთაშორისო პრაქტიკა. თუმცა ექსპერტთა ნაწილი ამბობს, რომ ბლუმბერგის სისტემა ჩვენისთანა პატარა ქვეყნისთვის არამართებულია.

თბილისის ბანკთაშორისი სავალუტო ბირჟის ყოფილმა ვიცე-პრეზიდენტმა და ფინანსისტმა ვახტანგ ხომიზურაშვილმა „კომერსანტთან“ აღნიშნა, რომ როდესაც ჩვენ ვეხებით საერთაშორისო პრაქტიკას, არ შეიძლება განვითარებული ბაზრების საფინანსო მოდელის პირდაპირ გადმოღება.

„საერთაშორისო ბაზრებზე, სადაც კაპიტალის ბაზრები განვითარებულია, არის მილიარდობით ბრუნვა, ტრანზაქციები და უამრავი მონაწილე. საქართველოში არის შეზღუდული მონაწილეების რაოდენობა და ძალიან მცირე სავალუტო ტრანზაქციები. ბანკების აქტივების 70% ორ ბანკს შორის არის განაწილებული და ნებისმიერ ბანკს შეუძლია გავლენა მოახდინოს სავალუტო კურსზე, ასევე არ კონტროლდება გარიგების შემდგომი ტრანზაქციები. აქ საქმე ტექნოლოგიებში არ არის, არამედ პრინციპებშია, ეს ბლუმბერგი იქნება თუ როიტერსი, არ აქვს მნიშვნელობა, თავის დროზე ეროვნულმა ბანკმა საბირჟო პრინციპების გამოყენებაზე თქვა უარი. მაგალითად, ადრე სავალუტო ბირჟაზე ბანკები ასრულებდნენ ფინანსური აგენტების, ანუ დილერების როლს. ეს ნიშნავდა იმას, რომ ყველამ იცოდა რა პრინციპით ყალიბდება ბანკთა შორის სავალუტო ბირჟაზე სავალუტო კურსი. ამიტომ მაქსიმალური მოთხოვნა-მიწოდების კონცენტრაციის პირობებში ხდებოდა კურსის დაფიქსირება, ამიტომ აბსოლუტურად ყველა კლიენტმა იცოდა, რა იყო საბირჟო კურსი. ამ შემთხვევაში ბანკების კლიენტურა დავალებებს აძლევდნენ კომერციულ ბანკებს, რომ შეეძინათ საბირჟო კურსით, იმიტომ რომ ყველაზე ობიექტური კურსი ბირჟაზე ყალიბდებოდა და ბანკები ასრულებდნენ ამას. დღესდღეობით არცერთმა კლიენტმა არ იცის, ბანკმა რა კურსით დადო გარიგება“, ¬ ამბობს ვახტანგ ხომიზურაშვილი.

მისივე თქმით, „დღესდღეობით აბსოლუტურად ქაოტურია სავალუტო კურსი, ეროვნული ბანკი რაც არ უნდა ინტერვენციებს ახორციელებდეს, არ არის ეფექტიანი, ეს არის პირდაპირი გაგებით რეზერვების არაეფექტიანად გახარჯვა. თუ დროულად არ იქნება შემოღებული ზუსტად ის საბირჟო პრინციპები, რომელიც უზრუნველჰყოფს სამართლიანი და საბაზრო კურსის ჩამოყალიბებას, ერთ დღეს შეიძლება სავალუტო ბაზარზე კატასტროფა მივიღოთ. ასევე უნდა ვთქვათ, რომ ლარის ასეთი გადამეტებული გაუფასურება დამსახურებაა იმ გაუმჭვირვალე პრინციპების, რა პრინციპებითაც ფორმირდება სავალუტო კურსი. გაუმჭვირვალობაში ვგულისხმობ იმას, რომ თვითონ ბიზნეს წრეები, ბიზნეს სუბიექტები, მოსახლეობა არ არის გათვითცნობიერებული, თუ რა პროცესები მიმდინარეობს“, -აცხადებს ხომიზურაშვილი.

აღსანიშნავია, რომ ბლუმბერგის ელექტრონულ სავაჭრო სისტემის Bmatch პლატფორმაზე ხდება მის მონაწილებს შორის უცხოური ვალუტის ყიდვა-გაყიდვაზე გარიგებების დადება. Bmatch პლატფორმაზე მონაწილეობის უფლება აქვთ ბლუმბერგის სისტემით მოსარგებლე ადგილობრივ კომერციულ ბანკებს, მიკროსაფინანსო ორგანიზაციებს, ასევე ეროვნული ბანკის თანხმობით სხვა ადგილობრივ და უცხოურ კომპანიებს.