საქართველოს ეროვნული ბანკის ყოფილმა პრეზიდენტმა გიორგი ქადაგიძემ ტელეკომპანია „ფორმულას“ გადაცემა „პლატფორმაში“ წარმატებულ რუსულ პროპაგანდაზე ისაუბრა. მისი განცხადებით, ერთ-ერთი ყველაზე საფრთხის შემცველი და ძალიან მგრძნობიარე საკითხი სამწუხაროდ წარმატებული რუსული პროპაგანდაა, როდესაც ქადაგიძის თქმით ქვეყნის მთავარ მოკავშირეებს ერთის მხრივ აზერბაიჯანს და მეორეს მხრივ თურქეთს ანტი-აზერბაიჯანულ და ანტი-თურქულ ჭრილში განიხილავენ, რაც კვლევებშიც ძალიან კარგად ჩანს.
„დარწმუნებული ვარ, რომ ჩვენ მოსახლეობას ეს კარგად ესმის, მაგრამ კიდევ ერთხელ მინდა გავიმეორო, რომ თუ საქართველოს ტრანზიტულ პოტენციალს, ლოკაციას, მდებარეობას, მატერიალიზაცია უწერია, იქნება ეს გაზსადენის, ნავთობსადენის, საერთაშორისო დიდი ქვეყნების ინტერესის ქვეშ ქონის, ჩინეთიდან ევროპაში და ევროპიდან ჩინეთში ტვირთების, პორტის და ზოგადად ქვეყანის გამდიდრების იდეა, ეს შესაძლებელია იმ შემთხვევაში თუ ჩვენ სტრატეგიულად საუკეთესო ურთიერთობებში ვიქნებით აზერბაიჯანთან და თურქეთთან, სხვა შემთხვევაში საქართველო არის ჩიხი და ჩიხში არასდროს არ არის განვითარება. რეალურად უკვე ამდენი ხანია, ზუსტად აქ ურტყამს რუსული პროპაგანდა და ქმნის ანტი-თურქულ და ანტი-აზერბაიჯანულ განწყობებს. დღეს ყველაზე ცუდი ურთიერთობა გვაქვს აზერბაიჯანთან და თურქეთთან“, - აღნიშნავს გიორგი ქადაგიძე.
თაკო კვაჭანტირაძე
აზერბაიჯანი
