„თუ არ აწყობდა „ევექსს“ ინგოროყვას კლინიკა, მაშინ თავის დროზე რატომ იყიდა?“ - ინგოროყვას კლინიკის 50% წილის მფლობელი გოჩა ინგოროყვა „ევექსის“ მიერ 40% იანი წილის გასხვისებაზე საუბრობს, რომელსაც „ევექსმა“ ნაკლებშემოსავლიანი აქტივი უწდა.
21 აგვისტოს ცნობილი გახდა, რომ „საქართველოს ჯანდაცვის ჯგუფმა“ ინგოროყვას კლინიკის 40%-იანი წილი 12 მლნ დოლარად გაყიდა. მყიდველი თბილისის სახელმწიფო სამედიცინო უნივერსიტეტია. ჯანდაცვის ჯგუფმა ინგოროყვას კლინიკის 50 პროცენტი 2015 წელს 17 მილიონ დოლარად შეიძინა, ამასთან 5 წლის მანძილზე დარგის განვითარებაში რამდენიმემილიონიანი ინვესტიცია განახორციელა.
რატომ გადაწყვიტა „ევექსმა“ მის საკუთრებაში არსებული ერთ-ერთი უმსხვილესი აქტივის გაყიდვა? „კომერსანტი“ ერთ-ერთი ყველაზე ცნობილი გარიგების დეტალებით დაინტერესდა და ინგოროყვას კლინიკის 50 პროცენტიანი წილის მფლობელს გოჩა ინგოროყვას გაესაუბრა.
ქირურგი განმარტავს, რომ ერთობლივი მუშაობით კლინიკის არაერთი დარგის განვითარება მოხდა და 5 წლის წინ, კლინიკის აქტივების შეძენით „ევექსს“ არაფერი წაუგია.
„ევექსს არაფერი არ წაუგია ჩვენი კლინიკის შეძენით,მაგრამ თავისთავად ცხადია შემოსავალი შემცირდა იმიტომ, რომ ფასები შემცირდა სახელმწიფოს მიერ. თორემ, ავადმყოფი იმაზე მეტია, რაც გარიგება გვქონდა და ახალი დარგები უფრო მეტი დაინერგა, ვიდრე მაშინდელი შეთანხმება ითვალისწინებდა. ზარალიანი არ ყოფილა კლინიკა, ნაკლეშემოსავლიანი - შეიძლება, რადგანაც მედიცინა დიდ ფულს ვერ იგებს. საავადმყოფოდან რაც ჩემი წილი მოგებული მაქვს, სულ რეფინანსირებაში მაქვს გაშვებული და ერთი თეთრი არ მიმიღია და არც ვიღებ. მოგება რაც იყო დარგების განვითარებაში და ახალი აპარატურის შესყიდვაში დაიხარჯა. ამდენი აპარატურა და ამადენი დარგი არცერთ საავადმყოფოს არ აქვს მთელ ამიერკავკასიაში.
რაც შეეხება ევექსის გადაწყვეტილებას, ვერ გეტყვით, კომერციულად რომ შევხედოთ, თუ არ აწყობდა ინგოროყვას კლინიკა, მაშინ რატომ იყიდა? თავდაპირველად ევექსთან შეთანხმების მიზანი იყო ის, რომ მინდოდა კლინიკის ფინანსურად გაძლიერება, „ევექსი“ კი ფინანსურად ძლიერი იყო. თუ ეს საავადმყოფო არ ვარგოდა, რატომ იყიდა, ან რატომ ჰყიდის? „ევექსი“ ჩემი ოჯახის წევრია და არ მინდა ასეთ თემებზე საუბარი. ვერ გეტყვით, გაყიდემეთქი, არ მითხოვია და არც ერთს მოგება არ წაგვიღია სახლში,“- განმარტავს გოჩა ინგოროყვა.
ნასყიდობის ხელშეკრულება GHG-სა და თბილისის სახელმწიფო სამედიცინო უნივერსიტეტს შორის 19 აგვისტოს გაფორმდა. ჯანდაცვის ჯგუფის ინფორმაციით, უნივერსიტეტი აღნიშნულ აქტივს როგორც სასწავლო პლატფორმას ისე გამოიყენებს. გარიგების მოცულობა კი 12 მლნ დოლარია.
გარიგების შედეგად, ინგოროყვას კლინიკაში GHG-ის წილი 10%-მდე შემცირდა, რომლის გასხვისებასაც ჯგუფი უახლოეს მომავალში გეგმავს.
შეგახსენებთ, საქართველოს ჯანდაცვის ჯგუფი ლონდონის საფონდო ბირჟიდან მოიხსნა. ეს გადაწყვეტილება კომპანიამ 8 ივლისს მიიღო, თუმცა ძალაში 2020 წლის 5 აგვისტოს შევიდა. GHG კერძო კომპანია გახდა და მისი აქციები Georgia Capital-მა გამოისყიდა, რომელიც აქამდე „საქართველოს ჯანდაცვის ჯგუფის“ 70.6%-იანი წილის მფლობელი იყო.