პანდემიის გამო ხელისუფლებამ ქვეყნის მასშტაბით, 14 აგვისტოდან 13 სექტემბრამდე მუნიციპალური ტრანსპორტის მუშაობა შეაჩერა, მაგრამ საქმიანობის უფლება ჰქონდა რითეილ ბიზნესს. იქ დასაქმებული ადამიანები, ფაქტობრივად, გამოუვალ ვითარებაში აღმოჩნდნენ, მათ სამსახურებამდე მისვლის პრობლემა შეექმნათ, ამის შედეგად ბიზნესს ხარჯი გაეზარდა, მეორეს მხრივ კი გადაადგილების პრობლემა ჰქონდათ მათ მომხმარებლებსაც, რაც კომპანიების შემოსავლებზე უარყოფითად აისახა.

პანდემიის შედეგად ისედაც შემცირებული მოგების პირობებში ეს ბიზნესისთვის კიდევ ერთი დარტყმა აღმოჩნდა. Gtex ჯგუფის ხელმძღვანელი გიორგი ბასილაძე „კომერსანტთან” ამბობს, რომ ტრანსპორტის ჩაკეტვამ გაყიდვები კატასტროფულად შეამცირა და თუ ხელისუფლება კიდევ ერთხელ გადადგამს მსგავს ნაბიჯს, ეს ბიზნესისთვის დამღუპველი აღმოჩნდება.

„მაისიდან მოყოლებული გაყიდვები იზრდებოდა, აგვისტოც კი დამაიმედებელი ჩანდა, თუმცა ტრანსპორტის ჩაკეტვამ ყველაფერი შეცვალა. როცა ტრანსპორტი გაჩერებული იყო, გაყიდვები კატასტროფულად, მინიმუმ 30-35%-ით შემცირდა. იმედია, ეს აღარ განმეორდება. ეს ყველაფერი იმის გამო მოხდა, რომ ვაქცინაცია თავის დროზე არ დაიწყო, ახლაც ვერ აბამენ თავს, ამის შედეგად კი ბიზნესს აქვს დამატებითი პრობლემები. უტრანსპორტობამ მყიდველების შემცირების გარდა, ხარჯები გაგვიზარდა, რადგან ვაფინანსებდით ჩვენი თანამშრომლების გადაადგილებას. ჯერჯერობით ყველა ბრენდს ვინარჩუნებთ, თუმცა ქამრები გვაქვს შემოჭერილი, გადაგორების რეჟიმში ვართ, ახალი ბრენდების შემოყვანა ამ ეტაპზე გადავდეთ. იმედი გვაქვს, მომავალ წელს ჩამორჩენილ ქვეყნებშიც გამოსწორდება სიტუაცია და ჩვენც გავაგრძელებთ გაფართოებას”, - აღნიშნა გიორგი ბასილაძემ.

შპს Gtex-ი 2007 წლის 17 დეკემბერს დაარსდა. პირველი ბრენდი, რომელიც კომპანიამ საქართველოში შემოიტანა collezione იყო. ამჟამად „ჯითექსი“ წარმოდგენილია ბრენდებით: collezione, OVS, Penti, Terranova, English Home, Enza Home.

ნინო თამაზაშვილი