იტალიელი ბიზნესმენი ფაბიო მანინი, რომელიც ჯერ კიდევ ვერ ახერხებს საკუთარი კლუბის, ქუთაისის „ტორპედოს“ ოფიციალურად გადაფორმებას, თვეებია გუნდის სახელფასო დავალიანებას ისტუმრებს, ფეხბურთელებს სხვა საჭირო პირობებს უქმნის და აკადემიის აშენებასაც გეგმავს. თუმცა კლუბი ჯერ კიდევ იურიდიულად მისი არ არის.
როგორც „კომერსანტს“ „ტორპედოს“ პრესსამსახურში განუცხადეს კლუბის გადაფორმება ბოლოს მარტის თვეში უნდა მომხდარიყო, თუმცა პანდემიისა და იურიდიული საკითხების მოუგვარებლობის გამო, პროცესი სექტემბრამდე გადაიდო. ამ დროის მანძილზე კი იტალიელ ინვესტორს კლუბის გეგმების განხორციელება არ შეუწყვეტია და ტორპედოს აკადემიის აშენებას გეგმავს და ამ საკითხზე ეკონომიკის სამინისტროსთან მოლაპარაკების პროცესშია.
„ კლუბი არ გადაუციათ ოფიციალურად ახალი მფლობელისთვის , წარადგინეს, დააანონსეს, რომ გადასცემენ მაგრამ, საკითხი კვლავაც მოუგვარებელია. ქუთაისის „ტორპედო“ მანინისთვის მარტში უნდა გადაეცათ. რაღაც იურიდიული საკითხები იყო მოსაგვარებელი, მთავრობასთანაც ჰქონდა რაღაც შეთანხმება მიღწეული, მარტში უნდა ჩამოსულიყო, მაგრამ დაიწყო პანდემია, აიკრძალა ფრენები და ვერ ჩამოვიდა. ახლა ეუბნებიან, რომ როგორც კი ჩამოვა ყველაფრის გადაფორმება მოხდება. სამჯერ აიღო ბილეთი და სამივეჯერ გადაიდო ფრენები.
გამომდინარე იქიდან, რომ საუბარია 50 000 დოლარის ინვესტიციაზე, მთავრობის მხრიდან ეუბნებიან, რომ ონლაინ გადაფორმება ვერ მოხერხდება, ყველა ელოდება მის ჩამოსვლას.
გუნდი ვარჯიშობს, თამაშებზე დადის, ხელფასები აქვთ, გუნდს რაც შეეხება ყოველ შემთხვევაში მისი მხრიდან ყველაფერი კეთდება,“ - აღნიშნავს ქუთაისის ტორპედოს პრესსამსახურის უფროსი ედო ბადლაშვილი.
50 000 კვადრატულ მეტრზე „ტორპედო“-ს ახალ მფლობელს აკადემიის აშენების ვალდებულება აქვს, ასევე გეგმავს ბავშვებისთვის ორი მოედნის აშენებას და ხუთ ვარსკვლავიანი სასტუმროს განთავსებას. ამასთან დაკავშირებით ეკონომიკის სამინისტროსგან საბოლოო პასუხს ელოდება..
მარიამ მორგოშია