საქართველოს პარლამენტის ჯანდაცვის კომიტეტის თავმჯდომარის დიმიტრი ხუნდაძის განცხადებით, რეგიონებში ჰოსპიტალური სექტორის მონიტორინგი გრძელდება.

მისივე თქმით, საზედამხედველო ჯგუფის შემადგენლობა გაფართოვდება და თითოეულ რეგიონში ეყოლებათ წარმომადგენელი, რომელიც ხარვეზებს დააფიქსირებს.

„თუ იქნება სადმე ხარვეზები, იქნება პირდაპირ ხაზზე მოწოდებული ინფორმაცია. ჩვენ მოვახდენთ სწრაფ რეაგირებას. ჩვენ შევდივართ კრიტიკულ ფაზაში, ანუ პირველი მიღების ზოლი იქნება სწორედ ჰოსპიტალური სექტორი. ამიტომ ეს სისტემა უნდა იყოს მყარი, რათა ნებისმიერი სიმძიმე დაძლევადი იყოს, დაცული იყოს თითოეული მოქალაქის ჯანმრთელობა. რეგიონებში ვაფასებთ, თუ როგორ არის მზად კონკრეტული კლინიკის ინფრასტრუქტურა, რომელიც ამ პროგრამაშია ჩართული. რა ხარისხითაა დატრენინგებული პერსონალი, როგორ არიან მზად ამ ვითარებისათვის. ინდივიდუალური დაცვის მარაგები როგორ აქვთ წარმოდგენილი, ასევე როგორ არის განაწილებული საპასუხუსმგებლო არეალი თითოეული პერსონალისთვის და როგორ არის სივრცეები გადანაწილებული, რომ არ იყოს ინფექციების კვეთა“ , – განაცხადა დიმიტრი ხუნდაძემ.

ამასთან, დიმიტრი ხუნდაძის განცხადებით, საერთაშორისო მხარდაჭერასთან ერთად, საქართველოს კორონავირუსთან ბრძოლის პროცესში აქვს აღიარებაც.

„გარდა იმისა, რომ გვაქვს საერთაშორისო მხარდაჭერა, ასევე გვაქვს აღიარება, რომ კორონასთან ბრძოლის საუკეთესო მაგალითი აჩვენა საქართველომ. პირველი ფაზა შეკავების გავიარეთ სწორად. ამიტომ ტვირთი პრეკრიზისულ ფაზაში არის მოსალოდნელი სცენარის მიხედვით და არა უფრო მეტი, თუმცა, რა თქმა უნდა, გასავლელია ყველაზე რთული, კრიზისული ფაზა. დარწმუნებული ვარ, ამ ფაზას გავივლით სწორად, ნაკლები დანაკარგებით. საბოლოოდ შემფასებელი იქნება საზოგადოება, რომლის ჯანმრთელობასაც ჩვენ დავიცავთ“ , – განაცხადა დიმიტრი ხუნდაძემ.

1tv.ge