კომპანია Procter & Gamble-ის პროდუქცია, რომელიც ქართველი მომხმარებლებისთვის, ძირითადად, Tide-ის, Ariel-ის, Fairy-სა და Pampers-ის ბრენდების პროდუქტებით არის ცნობილი, კიდევ უფრო გაძვირდება. ამის შესახებ განცხადება P&G-ის ფინანსურმა დირექტორმა, ანდრე შულტენმა გააკეთა.

მისი თქმით, ნედლეულისა და ლოჯისტიკური ხარჯების ზრდამ Procter & Gamble-ის მთლიანი მარჟები 400 საბაზისო პუნქტით შეამცირა. ნეგატიური გავლენა ნაწილობრივ მაღალი ფასებით, დაზოგვისა და პროდუქტიულობის ზომების გაძლიერებით კომპენსირდა. ამას თან დაერთო სავალუტო კურსის ხელსაყრელი სხვაობაც.

მარკეტინგული ხარჯები 5%-ით, 130 მლნ დოლარამდე გაიზარდა. ამ ხარჯების წილი მთლიან ხარჯებში არსებულ დონეზე დარჩა. ანდრე შულტენის თქმით, ვიდრე სარეკლამო ინვესტიციებიდან კომპანია კარგ შემოსავალს იღებს, ის მარკეტინგულ ბიუჯეტსაც გაზრდის. მარკეტინგული ხარჯების ეფექტიანობის ასამაღლებლად P&G ციფრულ დაფარვას გაზრდის და თარგეთინგს გააუმჯობესებს.

ანდრე შულტენმა ხაზი გაუსვა, რომ კომპანია თავისი ბრენდების კონკურენტუნარიანობაში ინვესტიციებს ყოველთვის დებდა და მომავალშიც ჩადებს. P&G ყურადღებას ამახვილებს ყოველდღიური მოხმარების პროდუქციაზე, პირველ რიგში სახლის მოვლის, ჰიგიენისა და ჯანმრთელობის პროდუქტებზე. ამ კატეგორიებში, რომელსაც კორპორაცია performance-driven-ს (შესრულებაზე ორიენტირებულს) უწოდებს, პროდუქტის ეფექტიანობა მომხმარებლის მხრიდან ბრენდზე არჩევანის გაკეთებას განსაზღვრავს. სწორედ ამიტომ Ariel-ის, Fairy-სა და Pampers-ის მწარმოებელმა გადაწყვიტა, ხარისხის, შეფუთვის, ბრენდის კომუნიკაციის, საცალოსთან თანამშრომლობისა და პროდუქტის ღირებულების დონე აემაღლებინა.

კოვიდპანდემიის მთავარი გამოწვევის ფონზე, როცა მიწოდების ჯაჭვი დაირღვა, შრომის დეფიციტი გაჩნდა, ტრანსპორტირება შეფერხდა და ინფლაციური წნეხი გაიზარდა, P&G-მა 2022 წლის (გადასახადების შემდგომი) სასაქონლო ხარჯების პროგნოზი 1.8-დან 2.1 მლრდ დოლარამდე გაზარდა. გარდა ამისა, კომპანია ტრანსპორტირებისა და სატვირთო ხარჯების 200 მლნ დოლარამდე ზრდას მოელის.

კორპორაციამ აშშ-ს ბაზარზე ფასები უმეტეს კატეგორიაზე უკვე გაზარდა, დაწყებული დასუფთავების პროდუქტებიდან და მოვლის საშუალებებით დამთავრებული. ესენია: Baby Care, Feminine Care, Adult Incontinence, Family Care, Home Care, Fabric Care, Grooming, Skin Care, Oral Care. თუმცა ანდრე შულტენის თქმით, ფასები ბევრ სხვა ბაზარზეც გაიზრდება. ის აცხადებს, რომ ფასების მატებაში ერთიანი მიდგომა არ არსებობს და გადაწყვეტილება კატეგორიისა და ბრენდის მიხედვით მიიღება. თუმცა ფასის ზრდას ინოვაციების დანერგვაც ახლავს თან, რაც P&G-ს თავისი პროდუქციის დამატებითი ღირებულების შექმნის საშუალებას აძლევს მომხმარებლებისთვის.

შულტენი დარწმუნებულია, რომ ფასების ზრდა მომდევნო კვარტლებში გაყიდვების მთავარი მამოძრავებელი გახდება. ამავე დროს, კომპანია ყურადღებით დააკვირდება სამომხმარებლო ტენდენციებსა და მომხმარებელთა რეაქციას.

Bpn.ge